A Xunta pedirá un informe sectorial a Barro dentro do Plan Especial do Porto de Marín

A XUNTA COMUNICA AO PRESIDENTE DA AUTORIDADE PORTUARIA DE MARÍN O MÁXIMO INTERESE EN AXILIZAR A TRAMITACIÓN DO PLAN ESPECIAL DO PORTO

§         Durante a xuntanza, a secretaria xeral de Ordenación do Territorio e Urbanismo trasladoulle a situación na que se atopa a tramitación deste documento, que se aprobou inicialmente e que xa se someteu a información pública

§         Trátase dun documento necesario para garantir unha eficiente explotación do espazo portuario, o seu desenvolvemento, e a súa conexión cos sistemas xerais de transporte terrestre

A secretaria xeral de Ordenación do Territorio e Urbanismo, Encarnación Rivas Díaz, reuniuse esta mañá co presidente do Porto de Marín, José Benito Suárez Costa, para abordar o estado actual do Plan Especial do Porto de Marín, e subliñou o máximo interese por parte da Xunta de axilizar este documento. Durante a xuntanza, a representante da Consellería de Medio Ambiente, Territorio e Infraestruturas explicoulle a situación na que se atopa a tramitación deste documento, que xa se aprobou de forma inicial o pasado mes de agosto e foi sometido a información pública.

Unha vez recollidas a totalidade das alegacións, estudaranse e incorporaranse as que sexan aceptadas. Polo momento, presentaron alegacións os concellos de Pontevedra, Marín e a APDR, Asociación pola Defensa da Ría.

Ademais, o departamento que dirixe Agustín Hernández vén de solicitar os informes sectoriais a distintos organismos como á Deputación de Pontevedra, Puertos del Estado, Costas, á Axencia Galega de Infraestruturas (AXI), Augas de Galicia, Ferrocarrís e Pesca, entre outros; e deu audiencia aos concellos implicados: Marín, Pontevedra, Bueu, Moaña, Vilaboa, Ponte Caldelas, Barro, Meis, Poio, Campo Lameiro, Soutomaior, Cotobade, Cangas e Sanxenxo.

Posteriormente, procederase, por parte da Secretaria Xeral de Ordenación do Territorio e Urbanismo a emitir un informe xurídico e técnico e levarase a cabo a aprobación provisional do documento. Así mesmo, darase traslado aos concellos e á Autoridade Portuaria para que se pronuncien sobre o documento e, finalmente, levarase a cabo a aprobación definitiva polo conselleiro de Medio Ambiente, Territorio e Infraestruturas, Agustín Hernández.

Antecedentes

Sobre o Porto de Marín pesan dúas sentenzas que anularon, respectivamente, o Plan Especial do Porto do ano 2000 e a Modificación do Plan Especial do ano 2005. Este documento é necesario para a ordenación urbanística do sistema xeral portuario, e inclúe, entre outras determinacións, as medidas e previsións necesarias para garantir unha eficiente explotación do espazo portuario, o seu desenvolvemento, e a súa conexión cos sistemas xerais de transporte terrestre.

Como consecuencia da situación derivada da ausencia de Plan Especial, a Autoridade Portuaria de Marín e Ría de Pontevedra, está a impulsar un novo Plan Especial, correspondendo a Consellería de Medio Ambiente, Territorio e Infraestruturas a súa tramitación por afectar a dous municipios.

Deste xeito, ante a Secretaría Xeral de Calidade e Avaliación Ambiental iniciouse a tramitación da avaliación ambiental estratéxica do documento en febreiro de 2012.