A XUNTA ASUME AS SÚAS COMPETENCIAS URBANÍSTICAS DO CONCELLO PONTEVEDRÉS DE BARRO

A XUNTA ASUME AS SÚAS COMPETENCIAS URBANÍSTICAS dO CONCELLO PONTEVEDRÉS DE BARRO

§         A directora da Axencia de Protección da Legalidade Urbanística e o alcalde de Barro asinaron o convenio de adhesión

§         Os ingresos obtidos por multas coercitivas e sancións administrativas impostas en exercicio das competencias delegadas serán repartidos a partes iguais de modo que o 50% pasará á Xunta e o 50% restante ao concello

§         Deste xeito, Barro súmase ao listado de máis de 60 concellos galegos xa adheridos á APLU

A directora da Axencia de Protección da Legalidade Urbanística (APLU), María Martínez Allegue, e o alcalde de Barro, Jose Antonio Landín, veñen de asinar o convenio de colaboración entre o organismo dependente da Consellería de Medio Ambiente, Territorio e Infraestruturas, e o concello, polo que a Xunta asume as competencias urbanísticas de Barro.

Este acordo establece que o municipio delega na APLU o exercicio das competencias municipais de inspección, supervisión, sanción e restablecemento da legalidade urbanística en relación coas obras e usos do solo, que se executen sen licenza urbanística ou sen axustarse ás súas condicións. As actuacións terían que estar situadas nalgunhas das seguintes clases de solo: rústico e urbanizable, mentres non sexa aprobado o correspondente plan parcial ou de sectorización, así como no ámbito dos núcleos rurais delimitados.

A APLU é un ente público de natureza consorcial, dotado de personalidade xurídica, patrimonio e orzamento propios e plena autonomía no cumprimento das súas funcións, para o desenvolvemento en común pola Administración autonómica e os municipios que voluntariamente se integren nela das funcións de inspección, restauración da legalidade e sanción en materia de urbanismo, e o desempeño de cantas outras competencias lle asignan os seus estatutos.

Ingresos compartidos

Os ingresos obtidos por multas coercitivas e sancións administrativas impostas en exercicio das competencias delegadas serán repartidos a partes iguais de modo que o 50 por cento pasará á Administración autonómica e o 50 por cento restante ao concello.

Cómpre sinalar que a Axencia exercerá estas responsabilidades desde o día seguinte ao da publicación do convenio no Diario Oficial de Galicia (DOG) e considérase que a vixencia do convenio será indefinida. Nesta delegación de competencias non se inclúe a reposición da legalidade nin a potestade sancionadora en relación coas obras completamente rematadas antes da publicación deste convenio, que serán exercidas polo concello.

A resolución dos recursos administrativos interpostos contra os actos emitidos pola axencia en exercicio de competencias delegadas corresponderá ao concello.

Por último, o Concello debe prestar a cooperación e asistencia activa que o organismo autonómico solicite, co fin de levar a cabo un eficaz exercicio das súas competencias; terá tamén que facilitarlle ao persoal da Axencia o acceso inmediato aos expedientes de planeamento, xestión e disciplina urbanística, así como canta información, documentación e axuda material precise para o adecuado cumprimento das súas funcións; e contribuír ao sostemento económico da Axencia nos termos que establece o citado convenio de adhesión.

Concellos adheridos

Coa sinatura deste convenio, Barro súmase aos 61 concellos adheridos á Axencia, que colabora coa administración local co fin de garantir un maior cumprimento da normativa urbanística e atallar as infraccións que se comenten así como repor a realidade física alterada, ademais de aportar maior información e formación para o persoal do concello que se adhire.