O 1
de novembro deberán estar traballando os 870 traballadores que a Administración
Provincial destina aos municipios
· O orzamento do programa supera os 3
millóns de euros
· Trátase dunha medida dirixida
especialmente a persoas de máis de 30 anos sen emprego nin prestacións
· Cada concello poderá dispor de entre
8 e 17 traballadores, en función do número de habitantes
· Os contratos serán a tempo parcial e
cunha duración de seis meses
· Búscase darlle unha oportunidade ao
maior número posible de persoas e dotar aos concellos de recursos humanos para
a prestación de servizos básicos
O 1o de outubro é a data límite para que os concellos da provincia que desexen
acollerse ao II Plan de Emprego da Deputación Provincial presenten as súas
solicitudes, co obxectivo de que antes do 1 de novembro estean formalizados os
870 contratos que a Administración Provincial financiará para que traballadores
desempregados presten servizos básicos nos concellos.
Na solicitude os concellos deberán indicar os servizos para os que demandan
o persoal e o perfil das persoas desempregadas que precisan contratar, tendo en
conta que deberán ir destinadas obrigatoriamente á prestación ou ao
desenvolvemento de servizos, tarefas e funcións de carácter prioritario.
870 novas oportunidades
O obxectivo da Administración provincial é darlle unha oportunidade de
traballo a persoas que nestes momentos se atopan nunha situación precaria. Por
iso, a iniciativa vai dirixida especialmente a persoas de máis de 30 anos que
non só se atopen en situación de desemprego, senón que tamén carezan de
prestacións ou dispoñan unicamente de prestacións sociais básicas coma o RISGA.
Os contratos serán a tempo parcial e cunha duración de seis meses, co que
se busca darlle unha oportunidade ao maior número posible de persoas, ao tempo
que se dota aos concellos de recursos humanos para a prestación de servizos
básicos.
Nesta liña, cada concello disporá de entre 8 e 17 traballadores, segundo o
número de habitantes.
Financiamento íntegro dos
custes salariais
Os concellos beneficiarios deste Plan de emprego terán que solicitar os
traballadores a través da oficina pública de emprego e encargaranse de tanto de
facer a selección do persoal de entre os candidatos remitidos pola antedita
oficina como de formalizar os contratos.
Pola súa banda, a Administración Provincial correrá cos custes salariais
íntegros destas contratacións, para o que dispón dun orzamento de 3.010.953,60
euros, sendo o salario de cada traballador de 700 euros.
Preto de 3.000 postos de
traballo nun ano
Louzán lembrou que este II Plan de Emprego enlaza co I, que está a piques
de rematar e que deu traballo a outros tantos desempregados.
A el hai que sumar outras iniciativas coas que a Deputación de Pontevedra
está a impulsar o emprego na provincia, atendendo de maneira especial a
colectivos con especiais dificultades.
En total son preto de 3.000 os postos de traballo que a Deputación de
Pontevedra impulsará ao longo deste ano, entre os que figuran as contratacións
de preto de 1.800 persoas entre os anteditos dous Plans de Emprego para a
prestación de servizos básicos nos concellos, e dirixidos a persoal sen
cualificación e de difícil inserción laboral; e os dos dous Plans de Práctica
Laboral tamén en marcha.
No hay comentarios:
Publicar un comentario