Polémica no CEIP "Amor Ruibal" polos uniformes e Carta-Opinión dun pai, remitida a Voz de Barro.

  CARTA DUN PAI:

 Son os uniformes escolares boa ou mala idea?

Realmente, elimina diferenzas un uniforme?

Realmente, non é discriminatorio que as meniñas teñan que levar saia e os meniños pantalóns?

Realmente, supón un aforro para os pais e nais?

Realmente evita o conflito entre pais e fillos á hora de vestirse ?

Sería moi necesario que a todas esas preguntas respondese a directiva da AMPA do Amor Ruibal, ou o novo colectivo de pais e nais que acaba de xurdir e  que está moi interesado en impoñer  o uniforme nun colexio público, que non podemos esquecer que é publico; para uniformes xa teñen os colexios privados ou os concertados.

Por que, daquela, non matricularon os seus fillos neses colexios ?

Señores, eu escollín un colexio público, por que creo no ensino público  e na súa calidade, non por cómo son de bonitos os uniformes.

Referente ó tema de que o uniforme evita as diferenzas,  sería tamén moi preciso, regular as mochilas, estoxos, zapatos, e demais material escolar; e tamén sería bo que o profesorado acudise de uniforme, que menos para o noso cole.

Pode algo ser máis discriminatorio que diferenciar rapazas e rapaces cun uniforme con saia elas e con garabata eles. Si, só faltaría que o  vindeiro paso fose separar nas aulas por sexos.   ?.

¿ Por que me obrigan a comprar nunha determinada tenda? Eu quero decidir onde e en qué gasto o meu diñeiro, non quero pensar que alguén se aproveite da venda en exclusiva dos uniformes do cole de Barro, xa sería triste.

A solución non é poñerlles o uniforme e así evitamos o conflito cos rapaces; a función dos pais é educar e non acomodar ou compracer.

Reflexionemos e centrémonos nas cousas importantes tales como as dotacións en persoal e material para darlles os nosos fillos un ensino  de calidade, e digo ensino, xa que a educación recíbese sobre todo no fogar.