1.244 GRUPOS, INTEGRADOS POR MÁIS DE 30.000 PERSOAS, PARTICIPARÁN ESTE ANO NO PLAN CULTURAL 2014 DA DEPUTACION

Participan agrupacións de 23 modalidades artísticas diferentes, sendo as máis numerosas as masas corais

·       Rafael Louzán anunciou que este ano se porá en marcha un plan especial para apoiar a grupos culturais profesionais, en colaboración cos concellos

Un total de 1.244 grupos de toda a provincia participarán este ano no Plan cultural 2014, co que a Deputación de Pontevedra pretende seguir consolidando a enorme rede social que conforman as diferentes agrupacións culturais que se estenden por todos os concellos da provincia e que moven a máis de 30.000 persoas.

Rafael Louzán e a deputada responsable de Cultura, Ana Isabel Vázquez, destacaron o gran interese que esperta este programa, iniciado en 1981 e que cada ano conta cun maior número de grupos participantes.

De feito, nesta edición son 120 grupos máis que en 2013 os que participan, pertencentes a 23 modalidades diferentes.

As máis numerosas son as masas corais (con 185 grupos participantes), seguidas de grupos de gaitas (141), grupos folclóricos (140) e pandereteiras (126). No outro extremo sitúanse as orquestras clásicas (con 4 participantes); os grupos de ballet (4); poetas (9) e humoristas (11).

TIPO DE GRUPO	PARTICIPANTES 2014
MASAS CORAIS	185
GRUPOS DE GAITAS	141
GRUPOS FOLCLÓRICOS	140
PANDERETEIRAS	126
TEATRO	119
BANDAS DE MÚSICA	81
CLÁSICOS	74
GRUPOS FOLK	65
ANIMACIÓN INFANTIL	45
BANDAS DE GAITAS	41
MAJORETTES	33
OUTROS FOLCLORES	31
GRUPOS MÚSICO-VOCAIS	29
BAILE MODERNO	23
MAXIA	20
GRUPOS PLAYBACK	18
ROLDAS	17
POP-ROCK	15
CANTAUTORES	13
HUMORISTAS	11
POETAS	9
BALLET	4
ORQUESTRAS CLÁSICAS	4