Nos dous
meses de funcionamento, os técnicos da Unión de Consumidores atenderon a máis
de 3.000 familias
As oficinas
de asesoramento sobre aforro enerxético postas en marcha pola Deputación de
Pontevedra e a Unión de Consumidores de Galicia en Pontevedra, Vigo, Lalín e
Vilagarcía de Arousa seguirán abertas ao público durante todo o mes de
novembro, para atender a elevada demanda de información recibida nelas e que
foi imposible atender integramente nos dous meses de funcionamento inicialmente
previstos.
Así o
anunciou na mañá do venres o presidente da Deputación, Rafael Louzán, na rolda de
prensa posterior á Xunta de Goberno, onde destacou que a día de hoxe son “máis
de 3.000 familias” as atendidas nas 10 oficinas abertas ao público desde o 2 de
setembro.
Ante esta
situación e tendo en conta que son moitas aínda as persoas que están a demandar
asesoramento, a Administración Provincial decidiu prorrogar nun mes a apertura
de 4 dos centros tendo en conta tanto a demanda que rexistran como a súa
ubicación, co obxectivo de que todos os cidadáns teñan unha oficina próxima á
que acudir.
Ritmo crecente
O ritmo de
afluencia a estas oficinas foi en aumento a medida que pasaban as semanas, de
forma que desde a súa posta en marcha na primeira semana de setembro ata esta
última semana se cuadruplicou o número de consultas atendidas, pasando das 130
iniciais ás preto de 600 coas que se pechará esta semana.
Rafael Louzán
incidiu en que o balance destes dous meses ponm de manifesto o acerto da
creación destas oficinas, que permitiu aclarar “a máis de 3.000 familias”
cuestións como qué tipo de contrato teñen, se a potencia contratada é a que
precisan ou non, como entender a súa factura de electricidade e obter
información que lle vai permitir “aforrar entre 80 e 100 euros anuais”.
As principais
consultas realizadas centráronse na diferenza entre mercado libre e mercado
regulado e en saber en cal dos dous se ten contratada a subministración
eléctrica, sendo destacado o número de persoas que estaban no mercado libre sen
sabelo.
As condicións
de renovación dos contratos de subministro de enerxía eléctrica, permanencias e
penalizacións que pode implicar no caso de cambiar de compañía; as axudas
públicas existentes para facer fronte á factura eléctrica (en concreto a tarifa
de último recurso e o tícket eléctrico social) ou consultas sobre a tarifa de
discriminación horaria como forma de posibilitar o aforro na factura, foron
algunhas das dúbidas que máis frecuentemente se atenderon nas 10 oficinas.
Datos por oficina
As oficinas con maior afluencia foron as de Pontevedra,
Vigo e Vilagarcía, nas que se concentrou o 40% das consultas atendidas.
Así, na oficina de Pontevedra, situada no Edificio
Administrativo da Deputación, o número de familias atendidas nos dous primeiros
meses de funcionamento achegouse ás 500, mentres que en Vigo se situou no
entorno dos 400.
A falta aínda de coñecer o número de persoas que se
atenderán ao longo da xornada de hoxe, Vilagarcía levaba atendidas xa o xoves preto
de 400 familias.
Pola súa banda, a oficina de Lalín leva atendido máis de 250
persoas e o ritmo de afluencia das últimas semanas é crecente, de forma que pasou de atender unha media de
8-10 persoas a mediados de outubro a preto de 20 diarias na última semana.
Ante esta situación e a elevadísima demanda que se segue
a rexistrar, os usuarios de electricidade poderán seguir informándose nestas
catro oficinas, de forma que a situada en Lalín atenderá a todo o norte da provincia, a de Vilagarcía
e Pontevedra á zona centro e Vigo ao Sur da provincia.
Ás persoas atendidas nestas 4 oficinas, hai que sumar as
que acudiron ao longo destes dous meses a A Estrada e Tui, que pecharán hoxe
con preto de 300 persoas atendidas en cada unha delas; Cangas, con 220 persoas;
Cambados e Redondela, cunhas 200 persoas asesoradas en cada unha; e Ponteareas,
onde se atenderon máis de 250.
No hay comentarios:
Publicar un comentario