A institución provincial destinará 320.000 € para a
creación de espazos conxuntos de coworking no Polígono Industrial de Barro –
Meis e en Lalín nos que se realizarán actuacións de formación e seguimento de
proxectos emprendedores
A Deputación de Pontevedra ven de aprobar un
convenio de colaboración coa Escola de Organización Industrial (EOI) para a
realización de accións de formación e titorización no marco de espazos de
coworking no viveiro de empresas do polígono industrial de Barro-Meis e de
Lalín. Así, a institución provincial investirá 320.000 € (160.000 € en cada
polígono) para impulsar o emprendemento na provincia de Pontevedra, a través da
formación e titorización de persoas, promovendo o traballo por conta allea e a
creación de empresas.
O convenio, que terá unha vixencia de dous
anos prorrogables, ten por obxectivo a creación de espazos conxuntos de
coworking en Barro-Meis e Lalín, con conexión wifi e eléctrica, destinados ó
establecemento de emprendedores, previamente seleccionados, no que a través da
metodoloxía Lean Startup acelerarase o proceso para identificar a visibilidade
de proxectos emprendedores. Os espazos
contarán tamén cun servizo de coordinación para o apoio de emprendementos,
centro de formación e salas de reunión para o proceso de titorización.
A través desta actuación, a Deputación de
Pontevedra busca, ademais de fomentar o emprendemento, aumentar a probabilidade
de éxito dos proxectos dos emprendedores nun período limitado de tempo,
identificando aqueles con maior potencial de desenvolvemento. Para elo,
contémplanse a realización de catro convocatorias públicas de coworking cunha
duración, cada unha delas, de 5 meses, dando cabida cada unha a un mínimo de 16
e máximo de 22 proxectos emprendedores nos que participarán entre unha e tres
persoas. Cada convocatoria desenvolverá 12 obradoiros obrigados de formación de
5 horas cada un sobre o desenvolvemento de competencias de emprendemento e
xestión de proxectos. Ademais, todos os proxectos seguirán un proceso de
titorización de 40 horas.
Cada edición de coworking organizará eventos
co obxectivo de impulsar o networking entre emprendedores así como realizará,
nas semanas finais do proxecto, unha demoday de presentación das actuacións.
No hay comentarios:
Publicar un comentario