A SECRETARÍA XERAL DA IGUALDADE INFORMA DAS AXUDAS DISPOÑIBLES ÁS ASOCIACIÓNS DE MULLERES DA ÁREA DE PONTEVEDRA - Voz de Barro. Noticias

Breaking

El tiempo en Barro

El tiempo - Tutiempo.net

domingo, 12 de junio de 2016

A SECRETARÍA XERAL DA IGUALDADE INFORMA DAS AXUDAS DISPOÑIBLES ÁS ASOCIACIÓNS DE MULLERES DA ÁREA DE PONTEVEDRA




§      Susana López Abella mantivo unha reunión con colectivos de mulleres, na que tamén participaron a directora xeral de Comercio, Sol Vázquez, e a directora de Turismo, Nava Castro
§      Durante este mes de xuño e, como vén facendo habitualmente, a Secretaría Xeral da Igualdade, convocará unha orde de axudas e subvencións destinada ao movemento asociativo de mulleres. Este ano a orde terá preto de 200.000 euros

A secretaria xeral da Igualdade, Susana López Abella, mantivo unha reunión coas asociacións de mulleres, consumidoras e amas de casa para informar das axudas que a Xunta ten dispoñibles dentro do ámbito da igualdade.

A reunión, na que tamén participaron a directora xeral de Comercio, Sol Vázquez, e a directora de Turismo, Nava Castro, contou coa presenza de arredor de 70 persoas, que puideron coñecer de primeira man o contido destas subvencións convocadas, así como dialogar, formular dúbidas e necesidades e trasladar calquera outra cuestión que resultase de interese.

En concreto o obxectivo da reunión celebrada en pontevedra, era dar a coñecer todas as liñas de axuda, que dende o goberno galego e máis concretamente, dende a Secretaría Xeral de Igualdade, existen para contribuír á igualdade de oportunidades de homes e mulleres; axudar ás mulleres vítimas da violencia de xénero, mulleres emprendedoras, mulleres en risco de exclusión social, etc; así como as subvencións destinadas ao mantemento das asociacións de mulleres.

Con eses obxectivos, segundo explicou López Abella, durante este mes de xuño e, como vén facendo habitualmente, a Secretaría Xeral da Igualdade, convocará unha orde de axudas e subvencións destinada ao movemento asociativo de mulleres. Este ano a orde terá preto de 200.000 euros para axudar ao mantemento e para levar a cabo actividades e programas.

Neste mes de xuño tamén sairán publicadas no DOG as axudas para o fomento do emprendemento feminino en Galicia, o programa Emega, cun orzamento de 1,3 millóns de euros.

O programa Emega comprende un conxunto de axudas dirixidas a apoiar a posta en marcha, a mellora e a reactivación de iniciativas empresariais constituídas por mulleres, xunto con medidas complementarias para favorecer a conciliación da vida persoal, familiar e laboral, así como para ter acceso a servizos específicos de acompañamento, asesoramento e titorización co obxecto de facilitar a implantación e consolidación dos proxectos empresariais promovidos por mulleres.

Anualmente a Secretaría Xeral da Igualdade convoca unha orde de axudas aos concellos que este ano ten vixencia plurianual (2015-2016) por un importe de 4,6 millóns de euros,  que inclúe un programa de apoio aos centros de información ás mulleres, un programa de fomento da conciliación e un programa de prevención e tratamento integral da violencia de xénero.

Anualmente Igualdade tamén convoca unha orde de axudas ás ANPAS de centros públicos para realizar actividades extraescolares con fin de facilitar a conciliación, cun importe de 250.000 euros.

A secretaria xeral destacou que se destinan 1,7 millóns de euros a 60 entidades sociais que apoian a mulleres en situación de especial vulnerabilidade. Segundo a previsión das entidades de iniciativa social que resultaron beneficiarias, atenderán a máis de 4.000 mulleres, fundamentalmente a través de programas relacionados coa atención a mulleres vítimas de violencia de xénero, programas de apoio a mulleres con discapacidade, de acompañamento a mulleres xestantes e lactantes, programas para  favorecer a inserción laboral de reclusas e ex-reclusas, de acompañamento a mulleres inmigrantes; por citar algún exemplos.

López Abella detallou tamén a concesión das axudas á conciliación da vida familiar e laboral como medida de fomento da corresponsabilidade para os traballadores que se acollan á redución da súa xornada de traballo. O orzamento destas axudas ascende a 440.000 euros, e a contía que poden percibir as persoas beneficiarias vai dos 1.700 aos 3.700 euros, en función da porcentaxe de redución da xornada e do número de menores ao seu cargo.

Supoñen un apoio económico para aqueles traballadores que reduzan a súa xornada laboral a estes efectos, considerando que esta medida favorece tamén a permanencia no mercado laboral das mulleres traballadoras con responsabilidades familiares. Ademais dos varóns, as axudas tamén poden ser solicitadas por familias monoparentais, con independencia de que a persoa responsable da unidade familiar sexa un home ou unha muller.

No hay comentarios:

Publicar un comentario