Os técnicos da EFA constataron a
aparición de novas manchas desta enfermidade en todas as parcelas de
seguimento, sendo a comarca do Condado a máis afectada e a do Salnés que menos
incidencia presenta neste momento
A previsión de precipitacións e temperaturas suaves a
partires do luns son as máis propicias para a expansión do fungo que produce
esta enfermidade
A
Estación Fitopatolóxica de Areeiro vén de recomendar no seu aviso fitosanitario
de hoxe a necesidade renovar os tratamentos contra o Mildeu da viña en todas as
comarcas da provincia. Nos casos nos que se xa renovaron os tratamentos
recomendan constatar que están sendo eficaces e que a enfermidade non se está
estendendo. Os técnicos da EFA, ante as condicións climáticas que se veñen
rexistrando desde o luns, con temperaturas nocturnas que chegaron a acadar os 15 e 16 graos e que son especialmente
favorables para as infeccións secundarias, visitaron tanto as parcelas de
seguimento como outras de todas as zonas vinícolas da provincia. O resultado
foi que constataron a aparición de novas manchas de Mildeu independentemente da
variedade da viña, e nalgunha incluso observaron danos nos racimos e nos
pámpanos.
Neste
momento, a maior incidencia da enfermidade estase observando na comarca do
Condado, na que rexistraron síntomas no 100% das parcelas visitadas. Mentres, a
comarca que menor incidencia presenta é a do Salnés. En vista das previsións
metereolóxicas para a vindeira semana, con precipitacións e temperaturas
suaves, os técnicos da EFA recomendan non só renovar os tratamentos senón
ademais confirmar a súa eficacia. Neste punto, indican que se deben controlar
factores como a adecuada preparación do caldo, as doses, e o estado da
maquinaria, así como elixir o momento máis idóneo para a súa aplicación.
No
referente á viña, o aviso tamén indica a necesidade de vixiar a evolución de
síntomas de Brotite nos grans. En xeral, neste momento este fungo aínda ten
unha presenza residual e non se recomenda aínda a realización de tratamentos,
agás en casos puntuais. Polo tanto a recomendación é facer seguimento e valorar, segundo cada caso concreto, a
conveniencia de tratar este fungo para que non se estenda.
En
relación ao resto de enfermidades da viña como Oidio, Black Rot ou as polillas
do racimo non se encontraron novos síntomas significativos.
No
resto de cultivos, destaca a recomendación de manter as plantas de pataca
protexidas mentres se manteñan as condicións de humidade para protexelas do
Mildeu.
Saúdos
Gabinete de comunicación
No hay comentarios:
Publicar un comentario