Permanece aberto o prazo de matrícula ata o próximo
día 20 de setembro
A Escola de Cantería mantén aberto ata o día
20 de setembro o prazo para a matrícula do vindeiro curso 2016-2017, que
comezará as clases en outubro. O importe da matrícula é de 114,50 € e para
formalizar a matrícula só hai que presentar o impreso oficial, acompañado dunha
serie de documentación, na Secretaría da Escola ou no Rexistro Xeral da
Deputación. Toda a información, así como os documentos necesarios para a
matrícula, pode consultarse na páxina web www.canteiros.depo.es.
Para acceder aos estudos na Escola de
Cantería só é necesario posuír o título de graduado escolar ou equivalente. Hai
varias modalidades de estudos: a formación
oficial de canteiro ou canteira con clases polas mañás de luns a venres
-cunha duración de tres anos, que se pode ampliar dous anos máis para obter o título de mestre ou mestra canteiro-,
e a formación específica para canteiros e canteiras reciclados,
artesáns ou persoas con interese na escultura e cantería, con clases nocturnas
de luns a xoves, con dous anos de duración.
A Escola de Cantería, un centro educativo
único en Galicia, permite estudar a arte de traballar a pedra, continuando así
o saber dunha profesión tan arraigada en Galicia como a dos canteiros e
canteiras. En todos os estudos se imparten materias coma historia da arte,
debuxo artístico, debuxo técnico, modelado, escultura ou construción. Pero
ademais dos coñecementos teóricos tamén ten unha importancia crucial a
formación práctica, na que os alumnos e alumnas aprenden a realizar calquera
tipo de traballo en case calquera material, tanto de barro como escaiola,
bronce ou granito.
Nos seus 37 anos de historia, a Escola de
Cantería, dependente da Deputación de Pontevedra, ten realizado traballos en
pedra que se poden apreciar en distintos lugares de toda Galicia, no resto de
España e mesmo no estranxeiro. Por exemplo, no Centro Español de San Salvador
de Bahía, en Brasil, pode verse un hórreo feito por alumnos e alumnas da
Escola, así como unha escultura de Cervantes en Panamá para a Asociación Galega
de Empresarios Panameños ou unha escultura de Santiago Apóstolo na Cámara
Municipal de Peñafiel en Portugal.
As creacións do alumnado da Escola de
Cantería van dende bustos, monólitos, conxuntos escultóricos, construcións
arquitectónicas, esculturas, réplicas ou hórreos. Entre as obras máis recentes
podemos destacar algunhas deste curso, como a escultura de María Soliña para o
concello de Cangas, o busto de Rosalía de Castro para a Asociación de Veciños
de Montefaro en Domaio (Moaña) , o monumento de homenaxe á lingua en Mondariz
ou as cunchas de vieira para a Asociación Cultural da Vieira de Madrid.
Pero en toda a súa traxectoria, dende a
Escola de Cantería téñense realizado obras que se poden contemplar en toda a
provincia de Pontevedra e boa parte do resto do territorio. Só por citar algúns
casos, e ademais dos traballos que foron para o estranxeiro, en Galicia podemos
ver o busto de Torrente Ballester en Armenteira, a instalación de Punta
Moreiras (O Grove) dedicada aos homes e mulleres do mar, unha pista de skate en
Ponteareas, unha escultura para o concello de Cabana de Bergantiños, a
balaustrada do santuario da virxe do Corpiño en Lalín ou as figuras da festa do
Carneiro ao Espeto en Moraña.
Ademais destas creacións propias, dende a
Escola de Cantería tamén se traballa moito co alumnado na importancia da
restauración de pezas do noso patrimonio histórico-artístico. Así, entre outras
pezas, destacan o cruceiro de Quintáns de San Vicente de Nogueira en Meis, o
cruceiro de Campelo en Poio, o Calvario de Coiro en Cangas, o escudo do
concello de Vigo ou o Obelisco de Vilagarcía.
No hay comentarios:
Publicar un comentario