§ O Goberno galego publicará de forma inmediata no Diario Oficial da UE o anuncio previo da licitación da primeira
fase dos traballos, que prevé iniciar a mediados de 2020
§ Esta medida permitirá axilizar os trámites do proceso de contratación
das obras
§ Consistirán na construción dun novo edificio de 10 andares e case
75.000 metros cadrados
§ Nunha segunda fase acometerase a reforma do edificio hospitalario
actual, que suporá un investimento de aproximadamente 25 millóns de euros,
acadando o desembolso total os 140
millóns de euros
§ A Xunta aprobou xa o proxecto sectorial de incidencia supramunicipal do
complexo hospitalario e está a culminar as expropiacións, que supoñen un
investimento adicional de 3,8 millóns de euros
§ O Gran Montecelo permitirá responder ás necesidades sanitarias dunha
poboación de máis de 300.000 persoas de 26 concellos durante os próximos 50
anos
O Consello da
Xunta acordou hoxe iniciar os trámites necesarios para a contratación das obras
de reforma e ampliación do Hospital Público Gran Montecelo, en Pontevedra.
Consonte o
informe analizado hoxe polo Goberno galego, a Consellería de Infraestruturas e
Mobilidade remitirá de forma inmediata ao Diario
Oficial da Unión Europea, para a súa publicación, o anuncio previo de
licitación das obras da primeira fase, que suporán un investimento autonómico
de case 115 millóns de euros.
Este trámite supón
o primeiro paso no proceso de contratación das obras do Gran Montecelo, que a
Xunta prevé comezar a executar a mediados de 2020. Con este anuncio será
posible axilizar os prazos desa tramitación.
Esta primeira fase dos traballos consistirá na
construción dun novo edificio hospitalario dotado cunha superficie de case
75.000 metros cadrados distribuídos en 10 andares. Esta nova construción estará
composta por dous corpos, prevendo que o primeiro volume, destinado a servizos
ambulatorios, actúe como zócalo dun segundo volume que albergará as áreas de
hospitalización.
Nunha
segunda fase acometerase a reforma do edificio hospitalario actual, que suporá
un investimento de aproximadamente 25 millóns de euros, acadando o desembolso
total os 140 millóns de euros.
Contará con espazos máis acolledores en áreas
máis sensibles, como a diálise, o hospital de día de oncoloxía, coidados
paliativos ou a zona materno-infantil. Segundo recolle o Plan director, preto
do 60% dos cuartos serán individuais (fronte ao 36% actuais), aumentará nun 92%
o número de salas e postos de urxencias, e súmanse un 49% máis de postos no
Hospital de día (que pasan de 109 a 162), incluíndo, deste xeito, melloras na comodidade,
na intimidade e nos espazos de esparcemento para pacientes e familiares. E
disporá dos novos servizos de radioterapia, UCI pediátrica e medicina nuclear.
A Xunta aprobou xa o proxecto
sectorial de incidencia supramunicipal do complexo hospitalario e está a
culminar as expropiacións, que supoñen un investimento adicional de 3,8 millóns
de euros.
O Gran Montecelo permitirá responder ás
necesidades sanitarias dunha poboación de 300.000 persoas de 26 concellos
durante os próximos 50 anos
