CORES TOURÍS COMPROBA o remate dos traballos da nova glorieta da po-531 na devesa, NO CONCELLO DE PONTEVEDRA

                                                                                                                            

• O delegado territorial da Xunta en Pontevedra destacou que estas melloras contaron contaron cun orzamento de 580.000 euros e permitirán minimizar o impacto no tráfico dunha estrada que conta con máis de 20.000 vehículos ao día
• A rotonda complementouse cun ramal de novo trazado que conecta coa vía principal da Devesa e permite eliminar o carril central para realizar o xiro á esquerda da intersección no punto quilométrico 6+620

O delegado territorial da Xunta en Pontevedra, José Manuel Cores Tourís, comprobou, xunto a asociación de veciños da Devesa, o remate dos traballos da segunda fase de mellora da PO-531 que consistiron na execución dunha nova glorieta e dun ramal de novo trazado que conecta coa vía principal.

Na visita, o delegado territorial estivo acompañado a maiores polo xefe territorial de Infraestruturas e Mobilidade en Pontevedra, José Luis Díez, polo xefe da Axencia de Infraestruturas de Pontevedra, Fausto Núñez, e por representantes dos veciños.

A Consellería de Infraestruturas e Mobilidade destinou a esta obra, contando con expropiacións e IVE, 580.000 euros.

Tal e como explicou Cores Tourís, os traballos leváronse a cabo entre os quilómetros 6+500 e 7+250, dándose así resposta á demanda dos veciños desta parroquia por onde transita a PO-531, e dando continuidade as obras que o departamento de Infraestruturas da Xunta acometeu nesta estrada no 2017, que permitiron a súa reordenación e mellora coa execución dunha glorieta no acceso ao polígono de Sequeiros, no concello de Barro.

O obxectivo principal deste nova actuación foi acadar a redución da velocidade de circulación. A glorieta conta con 44 metros de diámetro no punto quilométrico 7+150 da PO-531, situado á saída do núcleo da Devesa, e ten como obxectivo reducir de xeito significativo a elevada velocidade actual da circulación na contorna, facilitando os xiros en condicións seguras.

A glorieta entronca agora cun ramal de novo trazado, que se conecta coa vía principal deste núcleo e que permite así eliminar o carril central para realizar o xiro á esquerda da intersección do punto quilométrico 6+620. Este novo ramal conta cunha lonxitude de 380 metros, aos que hai que engadir os camiños de servizos, polo que a construción total é de 750 metros, facilitando a unión dos dous núcleos desta parroquia.

O delegado territorial tamén aproveitou a visita para agradecer enormemente “a colaboración dos veciños, tanto da Devesa como de Curro, xa que estamos a traballar con eles dende fai anos para continuar a mellorar esta imporante estrada que enlaza Pontevedra e O Salnés, e pola que circulan diariamente máis de 20.000 vehículos”.

Esta actuación complementouse coa rehabilitación do firme no tramo, a execución das obras necesarias para a drenaxe transversal e lonxitudinal e a reposición da sinalización e das barreiras necesarias, instalándose novas luminarias e un muro de escollera de contención.