A XUNTA ANIMA Á DEPUTACIÓN DE PONTEVEDRA A ACHEGAR O SEU MATERIAL DE PROTECCIÓN AO CENTRO LOXÍSTICO QUE REPARTIRÁ AOS CONCELLOS

§  O delegado da Xunta en Pontevedra, José Manuel Cores Tourís recorda que outras deputacións como a de Ourense, adquiriron equipamento para levar aos pequenos e medianos municipios

§  “Se Carmela Silva quere sumar, que é o que se precisa nesta situación, iso é o máis adecuado; se o que quere é confrontar unha vez máis, entón que non conte con nós”

§  A Xunta de Galicia repartirá esta semana 100.000 mascarillas, 15.000 traxes e 50.000 guantes aos concellos de toda a comunidade autónoma a través de Clonegal, o novo centro loxístico que a Xunta

O delegado territorial da Xunta en Pontevedra, José Manuel Cores Tourís, animou hoxe á Deputación provincial a achegar material de protección ao centro loxístico posto en marcha pola Xunta de Galicia. Ese centro loxístico levará o equipamento de xeito directo aos concellos e permitirá unha maior axilidade e comodidade para os municipios. “Se Carmela Silva quere sumar, que é o que se precisa nesta situación, é o máis adecuado. Se o que quere é confrontar unha vez máis, entón que non conte con nós”.

O responsable territorial indicou que outras administracións provinciais como a de Ourense xa está a colaborar neste senso e estiveron adquirindo equipos de protección nas últimas semanas, ao igual que fixeron tódalas administracións despois de que se comprobara que a decisión do Goberno central de autoasumir a centralización das compras resultaba insuficiente. 

Durante a pasada semana a Xunta, repartiu por medio das Delegacións Territoriais e en colaboración coa Federación galega de Municipios e Provincias (Fegamp), un total de 22.000 mascarillas. 300.000 luvas e preto de 10.000 traxes. Na área da Delegación Territorial da Xunta en Pontevedra foron un total de 62.759 unidades de protección: 13.242 mascarillas, 47.580 guantes, 102 gafas e 1.835 buzos entre 46 concellos da área territorial da Delegación da Xunta en Pontevedra.

Os concellos galegos están a empregar o material da Administración autonómica en ámbitos como o Servizo de Axuda no Fogar ou as emerxencias e a Protección Civil.

Cores Touris recordou que a Xunta de Galicia continuará esta semana con esta labor repartindo 100.000 mascarillas, 15.000 traxes e 50.000 guantes aos concellos de toda a comunidade autónoma. O material chegará directamente dende o centro loxístico que a Xunta ven de poñer en marcha para centralizar a adquisición e distribución de equipos de protección individual durante o estado de alarma e a emerxencia sanitaria por coronavirus.

Este centro loxístico, denominado Clonegal, ponse en marcha tralo aumento do material que chegará ás administracións locais e tamén co obxectivo da axilización do reparto, xa que os concellos recibirán os envíos no seu propio municipio e non terán que desprazarse. Os medios foron adquiridos directamente polo Goberno autonómico ante a escasez de subministración do Goberno central.

Con esta medida búscase organizar, ordenar e priorizar a distribución do material preciso para os labores de todo o persoal -agás o sanitario- involucrado na loita contra a expansión do virus, de forma que se dea cobertura ás necesidade de xeito centralizado e programado, co fin de optimizar as compras e a repartición.