A XUNTA CONTINUARÁ ESTE XOVES OS TRABALLOS DE LIMPEZA NAS MARXES DAS ESTRADAS AUTONÓMICAS DAS CATRO PROVINCIAS

 

A Consellería de Infraestruturas e Mobilidade, a través da encomenda á empresa pública Seaga, continúa as tarefas de control da biomasa nas marxes das estradas, cun investimento de case 1,5 M€

 

―      Proseguirán os labores en execución nas vías da provincia da Coruña: AC-840, en Oza-Cesuras, VG-1.4, ao seu paso polo municipio de Fisterra, e na autovía AG-64, en Narón

―      Continuarán estes traballos na estrada LU-540, ao seu paso polo municipio lugués de Viveiro; e na provincia de Ourense os xa iniciados na OU-300, en Allariz

―      Seguirán na provincia de Pontevedra as tarefas en execución na PO-531 en Vilanova de Arousa, Meis, Barro e Pontevedra; e na vía de altas prestacións VG.-4.4, Lourizán-Ardán, en Pontevedra e en Marín

―      Estas actuacións, que se suman ás realizadas a través dos medios de conservación ordinaria, favorecen a prevención dos lumes e contribúen á seguridade viaria

―      Estas tarefas levan permitido xa a roza mecánica de máis de 320 km, actuar nunha superficie de 112.500 m² de modo manual e retirar 1.500 árbores susceptibles de provocar lumes ou de invadir a calzada

A Xunta continuará este xoves os traballos de limpeza nas marxes das estradas autonómicas das catro provincias que xa tiña iniciado en semanas anteriores. 

A Consellería de Infraestruturas e Mobilidade iniciou o pasado mes de xullo estes traballos, tras renovar coa empresa pública Seaga o contrato para acometer tarefas de roza e limpeza nas estradas autonómicas para previr lumes e reforzar a seguridade viaria, cun investimento de preto de 1,5 millóns de euros.

Concretamente, este xoves proseguirán os labores en execución nas estradas da provincia da Coruña: AC-840, en Oza-Cesuras, na vía de altas prestacións VG-1.4, ao seu paso polo municipio de Fisterra, e na autovía AG-64, en Narón. 

Continuarán tamén estes traballos na vía lucense LU-540, ao seu paso polo municipio de Viveiro. Ademais na provincia de Ourense seguirán as intervencións iniciadas a finais do pasado mes de novembro na estrada OU-300, en Allariz.

Na provincia de Pontevedra prolongaranse os traballos en execución na estrada PO-531 en Vilanova de Arousa, Meis, Barro e Pontevedra; e na vía de altas prestacións VG.-4.4, Lourizán-Ardán, en Pontevedra e en Marín. 

Estas actuacións contribúen á prevención dos lumes, ao eliminar especies pirófilas como o piñeiro, o eucalipto ou a acacia nas marxes das vías de titularidade da Xunta. Dáse así cumprimento á Lei 3/2007, de 9 de abril, de prevención e defensa contra os incendios forestais de Galicia, que recolle o obxectivo da rotura da continuidade horizontal e vertical da biomasa, de modo que as estradas actúen con efecto “cortalumes”. 

O control da vexetación tamén supón a mellora da seguridade viaria. Os traballos realizados eliminan árbores que poderían caer á vía en caso de temporal e evitan que invadan as beiravías ou beirarrúas, facilitando o tránsito de peóns e ciclistas. Tamén serve para aumentar a visibilidade dos usuarios e consegue o efecto de afastar da vía animais como os xabarís.  Estas novas accións de conservación nas vías de titularidade da Xunta levan permitido, desde o inicio da renovación da encomenda a Seaga, a roza mecánica de máis de 320 quilómetros lineais, actuar nunha superficie de máis de 112.500 m² de xeito manual; ademais de propiciar a retirada de 1.500 árbores en dominio público de estradas, susceptibles de provocar lumes ou que supoñían un risco de caída na calzada. 

Cada semana, unha media de 30 operarios e arredor de 15 máquinas traballan para levar a cabo estas tarefas de limpeza e control da vexetación nas marxes das estradas autonómicas.

Con estes traballos tamén se dá cumprimento ao acordo do Pleno do Parlamento de Galicia do 25 de setembro de 2019, polo que se insta ás administracións públicas a impulsar unha redución progresiva do  uso de herbicidas nas marxes das estradas

O departamento que dirixe Ethel Vázquez intensificou nos últimos anos as accións de prevención de lumes nas marxes das estradas da súa competencia, engadindo aos medios de conservación ordinaria un reforzo con encomendas á empresa pública Seaga.

Coa nova encomenda a Seaga, desde o ano 2018 a Xunta leva investidos 6,8 M€ nas actuacións de control da biomasa nas marxes das estradas da súa competencia.