A AXENCIA DE DOAZÓN DE ÓRGANOS E SANGUE E A UNIVERSIDADE DE SANTIAGO DE COMPOSTELA MOBILIZAN Á COMUNIDADE EDUCATIVA NO “RETO 5000” DA REDE ESPAÑOLA DE UNIVERSIDADES SAUDABLES

·         Esta campaña especial achegarase aos campus de Lugo e Santiago o xoves catro de outubro e coincide coa II Edición do Reto da Froita

·         ADOS e a USC colaboran, desde hai 25 anos, na sensibilización do colectivo universitario a prol do solidario xesto da doazón, acumulando máis de 76.000 doazóns desde o ano 1993

A Axencia de Doazón de Órganos e Sangue (ADOS) e a Universidade de Santiago de Compostela (USC) convidaron hoxe á participación de todos os membros da comunidade universitaria para que tomen parte activamente no “Reto 5000”, promovido desde a Rede Española de Universidade Saudables (REUS). A directora de ADOS, Marisa López García, que estivo acompañada pola vicerreitora de Comunicación, Cultura e Servizos, Mar Lorenzo Moledo, indicou, no transcurso do acto de presentación desta iniciativa, que tivo lugar esta maña no Pazo de San Xerome, que este reto ten o obxectivo de acadar, ao longo do xoves 4 de outubro, un total de 5.000 doazóns de sangue entre todos os centros universitarios de España que se sumen a esta iniciativa.

Pola súa banda a vicerreitora, Mar Lorenzo Moledo destacou o compromiso da USC co Reto que se desenvolverá este xoves e, en xeral, coas campañas de ADOS pola súa dimensión social e solidaria, ao tratase dun acto de xenerosidade imprescindible ao que a comunidade universitaria nunca deixa de acudir.

Reto da froita

Esta campaña especial, na que toman parte activa as tres universidades galegas, coincide coa segunda Edición do Reto da Froita polo que todos aqueles que se acheguen a doar sangue ata as unidades móbiles de ADOS distribuídas nos sete campus galegos, recibirán unha peza de froita no refrixerio posterior á doazón. Neste sentido, a directora de ADOS manifestou que esta campaña ten unha dobre vertente: por unha banda, promover e sensibilizar a prol do solidario xesto da doazón e por outra, fomentar hábitos de vida saudables entre os universitarios e universitarias galegos.

Polo que atingue á presenza das unidades móbiles de ADOS, salientar que, ao longo da xornada de mañá xoves 4 de outubro, efectuarán os seguintes desprazamentos nas instalacións da USC:

CAMPUS DE LUGO:

Biblioteca Intercentros, das 09:30 ás 14:30 horas

CAMPUS DE SANTIAGO:

Campus Vida, diante da Facultade de Dereito das 09:30 ás 14:30 e das 15:30 ás 21:00 horas.

Traxectoria de colaboración

Marisa López quixo agradecer á USC o seu constante compromiso co labor desenvolvido por ADOS e que principiou no ano 1993, coa posta en marcha das primeiras campañas de doazón de sangue e que teñen situado á Universidade de Santiago como a de maior participación de Galicia, recollendo, no transcurso destes 25 anos, máis de 76.000 doazóns de sangue entre os centros docentes dos campus de Lugo e Santiago.

Nese mesmo sentido, manifestouse Lorenzo Moledo, salientando a sempre excelente resposta coa que cada ano a comunidade universitaria deixa constancia do seu compromiso. A vicerreitora chamou a atención tamén sobre a importancia que teñen as aulas universitarias para ser capaces de formar especialistas e persoal cualificado, pero tamén cidadáns comprometidos e comprometidas coa sociedade.

A directora de ADOS quixo por en valor a colaboración brindada polas tres universidades galegas e, lembrou, que a pasada semana comezou na compostelás Facultades de Enfermaría e Ciencias da Educación, a primeira fase da campaña de doazón de sangue nas Universidades galegas. Esta primeira fase prolongarase ata o vindeiro mes de decembro e entre os meses de marzo e maio do 2019 terá lugar a segunda fase de esta campaña especial de doazón.

O obxectivo da Axencia de Doazón de Órganos e Sangue para a este curso 2018-2019, pasa por superar as 4.542 doazóns rexistradas no pasado ano académico, das cales 1.555 correspóndense con persoas que doaron nos campus de Lugo e Santiago.

Importante participación

A directora de ADOS lembrou a importancia que ten o desenvolvemento das campañas de doazón no eido educativo, tanto en centros de educación non universitaria como universitaria xa que, para moitos xoves, é o primeiro contacto que teñen co solidario xesto da doazón de sangue.

Ademais, agradeceu a colaboración brindada polos reitores das tres universidades para levar a cabo tanto a campaña de doazón como o “Reto 5000”, ao tempo que fixo un chamamento a todos os membros da comunidade universitaria para que se acheguen a participar activamente nesta solidaria iniciativa.