Luis López anuncia un investimento de 1,45 millóns de euros para a xestión da rede Smartpeme+ e as oficinas Acelera Pyme Rural durante o 2025

 

A través do novo contrato xestionaranse as oficinas de Barro, Lalín, Pontevedra, O Porriño, Vigo, Cambados e Ponteareas, onde se asesorará a persoas emprendedoras e se levarán a cabo diferentes actividades

A Deputación de Pontevedra adxudicou o servizo de xestión da rede Smartpeme+ e das oficinas Acelera Pyme Rural para este 2025 por 1,45 millóns de euros. Así o anunciou o presidente provincial, Luis López, que destacou a “enorme capacidade emprendedora” da provincia. “E se os emprendedores apostan pola provincia, nós temos que apostar por eles, e por iso imos seguir tendendo pontes, ofertándolles servizos que nos referencian, como é o caso de SmartPeme e Acelera Pyme Rural”.

Desta maneira, a empresa adxudicataria encargarase de coordinar e xestionar as oficinas de SmartPeme+, localizadas en Barro, Lalín, Pontevedra, O Porriño e Vigo, e as oficinas Acelera Pyme Rural, que son as de Cambados e Ponteareas. Ademais, ofrecerase a ata 2.500 emprendedores, autónomos e pemes ao ano asesoramento personalizado no seu proceso de transformación dixital, posta en marcha e crecemento empresarial, baseado nas novas tecnoloxías. Por último, impartiranse un máximo de 200 talleres de sensibilización e celebraranse diferentes actividades complementarias.

Nas cinco oficinas pertencentes á rede Smartpeme+ prestaránselle servizos de asesoramento TIC; así como sobre crecemento empresarial a emprendedores, autónomos e pemes da provincia, mentres que nas dúas Acelera Pyme rural, a aqueles dos concellos de menos de 20.000 habitantes da provincia.