― Acondicionarase o firme en varios treitos das estradas PO-226, PO-303, PO-307, PO-308 e PO-550, que discorren polos concellos de Cuntis, Moraña, Barro, Poio, Sanxenxo, Meaño, Vilanova de Arousa, A Illa de Arousa, O Grove, Cambados e Ribadumia
― O contrato asinarase nos vindeiros días e a previsión é poder iniciar as obras na primavera
― Rehabilitarase a capa de rodaxe das estradas, restaurando ou mellorando as características do pavimento, adecuando as súas necesidades funcionais e de durabilidade
― A Xunta destina neste exercicio 68 M€ á conservación das estradas autonómicas
A Xunta adxudicou por 2.936.226 euros as obras para o reforzo do firme en 5 estradas autonómicas ao seu paso por 11 concellos da área de Pontevedra e da comarca do Salnés.
Esta intervención, adxudicada á empresa Construcións Obras e Viais, S.A. (Covsa), ten como obxectivo mellorar a capa de rodaxe en varios treitos das estradas PO-226, PO-303, PO-307, PO-308 e PO-550, que discorren polos concellos de Cuntis, Moraña, Barro, Poio, Sanxenxo, Meaño, Vilanova de Arousa, A Illa de Arousa, O Grove, Cambados e Ribadumia.
O contrato asinarase nos vindeiros días, e as obras comezarán previsiblemente na primavera. O prazo estimado de execución das obras é de 9 meses.
Os traballos consistirán na rehabilitación superficial do firme das estradas, restaurando ou mellorando as características do pavimento, adecuando as súas necesidades funcionais e de durabilidade.
A intervención incluirá a reparación de zonas de firme danado mediante fresados localizados e reposición dunha capa de firme, selado de fisuras lineais con mestura bituminosa e a creación dunha nova rodadura mediante recrecemento de firme.
O Goberno galego continúa a traballar para manter as vías de titularidade da Xunta nas mellores condicións e para garantir a seguridade viaria aos usuarios, destinando neste exercicio 68 M€ á súa conservación.
No hay comentarios:
Publicar un comentario