A OFICINA TÉCNICA DA SECA PROPÓN MANTER A ALERTA POR SECA DADO QUE OS RÍOS SEGUEN UN 52% POR DEBAIXO DO SEU CAUDAL HISTÓRICO

§  Na reunión celebrada esta mañá analizaron a situación dos ríos, tras o paso da borrasca Ana, cuxas chuvias reportaron unha recuperación dun 30% do caudal circulante

§  A previsión meteorolóxica, outro factor a ter en conta para manter a seca, indica que nos se esperan novas precipitacións ata despois do Nadal, cando se desprace o anticlón

§  Tamén se apreciou unha mellora dos embalses de abastecemento cunha media de case 66% debido ao dato de Eiras; pero sen telo en conta os embalses están ao 52%, mentres que a media histórica dos últimos 10 ano sitúase nun 68%

§  A Oficina Técnica da Seca, que incide no chamamento a facer un consumo responsable da auga e reducir o seu consumo, reunirase novamente a principios de xaneiro para valorar a situación

  

A Oficina Técnica da Seca propuxo esta mañá manter a declaración de alerta por seca en toda a Demarcación Hidrográfica Galicia- Costa, debido a que o caudal circulante dos ríos aínda se atopa a un 52% por debaixo do caudal histórico propio desta época.

Esta é unha das principais conclusións á que se chegou esta mañá na reunión da Oficina Técnica da Seca, presidida polo director de Augas de Galicia, Roberto Rodríguez Martínez, na que se analizou a situación dos recursos hídricos da Demarcación Galicia- Costa. Os técnicos concluíron que, con carácter xeral, apréciase unha recuperación dos caudais circulantes dos ríos de Galicia-Costa dun 30% respecto dos caudais que levaban os días previos á borrasca Ana.

A pesar desta subida xeral, os ríos da demarcación seguen un 52% por baixo do caudal que historicamente circula de media nesta época do ano; e indicaron que é posible que baixen nos próximos días, pois aínda se está a producir a estabilizacións dos mesmos, despois das chuvias da semana pasada. As concas do sur da Demarcación (Pontevedra) e do noroeste (a Mariña lucense) foi onde se notou unha maior melloría, aínda que a borrasca beneficiou a todas as concas da demarcación.

Indicaron que tamén se aprecia unha suba nalgúns dos pozos piezométricos que Augas teñen distribuídos pola Demarcación para valorar o nivel das augas subterráneas, que se poden considerar leves ou imperceptibles nalgunhas zonas.

En relación coa situación dos embalses, estes tamén melloraron e a media sitúase no 65,9%, empuxada principalmente polo enchido do encoro de Eiras (ao ser o máis grande dos existentes inflúe bastante no dato medio).

A OTS recoñece a melloría en xeral, pero a situación segue lonxe da situación de normalidade, e a modo de exemplo expuxeron os datos dos encoros de Forcadas (que abastece á area metropolitano de Ferrol) e Cecebre (abastece a área metropolitana da Coruña), que están un 20% por baixo do normal e mesmo no sur, Zamáns, atópase ao 40% por baixo do normal ou Baiona, un 50% por baixo tamén do normal.

De feito, indicaron que se non se contabiliza a situación de Eiras para o cálculo da media de  ocupación, o resto de embalses de abastecemento é de 51,9 %, un dato moi lonxe da media histórica dos últimos 10 anos, un 68%.

Á vista desta situación é necesario manter a situación de alerta, un decisión que tamén está avalado tendo en conta a predición meteorolóxica para as vindeiros días, que prevén unha semana seca, sen previsión de novas precipitacións ata despois da xornada da festividade do Nadal, día no que se prevé o desprazamento do anticiclón. Por tal motivo, desde a OTS, que volverá a analizar a situación a principios de xaneiro, inciden na necesidade de reducir o consumo de auga.