O DOG publica o programa de prácticas en empresas de mozos de ata 25 anos cualificados para favorecer o seu acceso a un traballo

• Está dirixido á mocidade cunha titulación universitaria, formación profesional de grado medio ou superior ou un certificado de profesionalidade
• A Administración autonómica financiará estas bolsas cunha axuda mínima de 640 euros para prácticas de menos de 4 horas ao día e cun mínimo de 800 euros para as de máis de 4 horas
• Os mozos e mozas que participen deberán estar inscritos no Sistema de Garantía Xuvenil
• O prazo para presentar as solicitudes para as axudas rematará o 15 de novembro

A Xunta apoiará a realización de prácticas non laborais dirixidas aos mozos e mozas con cualificación (titulación universitaria, ciclo de grao medio ou superior ou certificado de profesionalidade) para facilitar o seu acceso posterior ao mercado laboral. O Diario Oficial de Galicia (DOG) publica hoxe as bases desta iniciativa que forma parte das diferentes actuacións que está a levar a cabo a Administración autonómica a través do Sistema de Garantía Xuvenil e a Axenda 20 para o Emprego para impulsar o traballo entre os mozos e mozas galegos.
Os participantes, que deberán estar inscritos no Sistema de Garantía Xuvenil e ter entre 18 e 25 anos, non deberán ter tido unha relación laboral ou outro tipo de experiencia laboral superior a tres meses na mesma actividade. As prácticas, coas que se prevé beneficiar a máis de 130 mozos, terán unha duración de entre seis e nove meses.
Os beneficiarios recibirán unha bolsa de apoio por parte das empresas que financiará a Administración autonómica. A contía da mesma dependerá das horas diarias. Apoiarase cun mínimo de 640 euros as prácticas non laborais de menos de 4 horas ao día e cun mínimo de 800 euros as de máis de 4 horas. O prazo para presentar as solicitudes para as axudas rematará o próximo 15 de novembro.
Esta actuación, á que se dedican preto de 800.000 euros, forma parte da Axenda 20 para o Emprego coa que o Goberno galego está a favorecer o emprego xuvenil impulsando o traballo estable e de calidade.
A través do Sistema de Garantía Xuvenil favorécese o acceso ao mundo laboral dos mozos e mozas a través de catro eixos principais: a mellora da intermediación, da empregabilidade, incentivos á contratación e o fomento do emprendemento.
http://www.xunta.gal/notas-de-prensa/-/nova/4254/dog-publica-programa-practicas-empresas-mozos-ata-25-anos-cualificados-para-favorecer