A Deputación de Pontevedra ultima o traslado do Parque de Maquinaria ao polígono de Barro

 

A Xunta de Goberno aprobou unha ampliación do prazo de execución das obras do novo recinto, que mobilizan máis de 4 millóns de euros coa recuperación da xunqueira de Alba

O vicepresidente da Deputación de Pontevedra, Rafa Domínguez, deu conta dos avances no proxecto de traslado do Parque de Maquinaria da Deputación de Pontevedra ao polígono de Barro. Domínguez sinalou que a Xunta de Goberno provincial acaba de aprobar unha ampliación do prazo de execución dos traballos, que permitirán paralelamente a recuperación ambiental da xunqueira de Alba e suporán unha mobilización global de 4,4 millóns de euros.

Deste xeito, tal como sinalou o vicepresidente, “o prazo para o traslado do Parque de Maquinaria a Barro amplíase dous meses, do 28 de agosto ao 27 de outubro”, a petición da empresa pública Tragsa, encargada da execución. A ampliación deriva dunha acumulación de incidencias, entre as que se atopan, informou Domínguez, “as continuas subas de prezos dos derivados do petróleo, que deixaron deserto o expediente para a contratación da execución da capa de firme”. Así mesmo, “non dispoñer de enerxía definitiva na obra condicionou a súa posta en funcionamento e comprobación na data prevista”. Ademais, “estanse redactando os proxectos de legalización de todas as instalacións e adecuándoos á realidade da obra” e, por último, “a folga do metal, que afectou a todas as obras de todas as administracións, retrasou as subministracións de materiais”.

Na actualidade, os traballos do novo Parque de Maquinaria, que ocupará unha extensión de 8.800 m², “están moi avanzados, coa construción dos edificios finalizada. A parte de maior envergadura que queda por rematar é a da urbanización das rúas interiores do novo recinto”, asegurou o vicepresidente provincial.

Rafa Domínguez tamén informou da situación actual na xunqueira de Alba, onde “xa se demoleron por completo o Parque de Maquinaria e a Imprenta provincial e estase a levar a cabo a restauración ambiental”. Finalmente, sinalou que a previsión actual da Deputación é que as obras de recuperación rematen en outubro.