A XUNTA DESTINA MÁIS DE 6,6 M€ EN AXUDAS PARA AS ÁREAS DE REHABILITACIÓN DOS CAMIÑOS DE SANTIAGO, DA RIBEIRA SACRA E DE ILLAS ATLÁNTICAS

 

A convocatoria publicarase no Diario Oficial de Galicia o vindeiro luns, 30 de outubro, e as solicitudes poderán presentarse a partir do día seguinte e ata o 30 de novembro

 A Xunta de Galicia destinará este ano un total de 6.617.000 á concesión de axudas para a rehabilitación de vivendas e edificios residenciais nas Áreas de rehabilitación integral (ARI) supramunicipais dos Camiños de Santiago, da Ribeira Sacra e na do Parque Nacional das Illas Atlánticas.

 

O próximo luns, 30 de outubro, publicarase no Diario Oficial de Galicia a resolución do Instituto Galego da Vivenda e Solo (IGVS) pola que se realiza a convocatoria correspondente ás referidas liñas de axudas para 2023.

En concreto, para a ARI dos Camiños a dotación será de 5.472.000 euros, para a da Ribeira Sacra ascenderá a 1.133.000 euros e no caso da ARI das Illas Atlánticas, convocaranse por 12.000 euros. As solicitudes poderán presentarse a partir do día seguinte da súa publicación (é dicir, desde o 31 de outubro) e ata o 30 de novembro, salvo que previamente se esgote o orzamento dispoñible.

Para poder acollerse a estas subvencións é requisito imprescindible contar coa cualificación definitiva outorgada polo IGVS, que se obtén despois de realizar as obras de rehabilitación, para as que previamente deberá obterse a cualificación provisional.

Beneficiarios das actuacións

No ámbito das tres ARI supramunicipais poderán solicitar a cualificación provisional as comunidades de propietarios e as agrupacións de comunidades; as agrupacións de propietarios; e as persoas físicas propietarias de edificios ou vivendas.

A contía das axudas non poderá superar o 50% do importe subvencionable da actuación. Este límite incrementase ata o 75% se os ingresos da unidade de convivencia promotora da actuación e residente na vivenda son inferiores a 3 veces o IPREM ou cando se acometan actuacións para a mellora da accesibilidade e se acredite que na unidade de convivencia existen persoas con discapacidade ou maiores de 65 anos. O importe máximo das axudas poderá acadar os 30.000 euros.