§ Esta mañá celebrouse en Pontevedra a última das catro
xornadas coas que a Aplu difundiu entre o municipalismo galego as principais novidades
nas que traballa para mellorar o seu funcionamento e o actual abano de servizos
que presta
§ Ante preto de 70 urbanistas, alcaldes e técnicos
municipais, o director da axencia, José Antonio Cerdeira, explicou que esta
ampliación de funcións responde a unha demanda dos propios concellos e está
pensada, nunha primeira fase, para aqueles que teñan menos de 5.000 habitantes
§ Os ingresos municipais derivados das sancións e multas
que impoña a axencia veranse incrementados e os municipios adheridos disporán
dun novo servizo de asistencia e dun espazo de atención específico a través da
web da entidade
Representantes dun total de 217
concellos galegos participaron desde xaneiro nas catro xornadas informativas
coas que a Axencia para a Protección da Legalidade Urbanística (Aplu) deu a
coñecer as novas competencias municipais que asumirá ao longo deste ano, así
como unha serie de servizos presenciais e online que tamén ten previsto
poñer a disposición dos concellos adheridos.
Baixo o título Novos servizos e
competencias da Aplu, a cuarta e última destas xornadas congregou
esta mañá en Pontevedra a 68 persoas entre profesionais do urbanismo, alcaldes
e técnicos municipais de 43 concellos da provincia, que coincidiron en valorar
o esforzo da axencia para prestarlles asesoramento e cooperación en materia de
disciplina urbanística.
Pola súa parte, o director da Aplu, José
Antonio Cerdeira, explicou que unha das principais melloras nas que traballan
pasa por asumir as competencias sobre as infraccións naquelas obras suxeitas a
comunicación previa municipal e non só nas que requiran de licenza. Na
actualidade, segundo explicou, os convenios de delegación de funcións dos
concellos adheridos tan só contemplan a intervención da Aplu cando a obra está
sometida a licenza.
Sen embargo, son as pequenas construcións,
como muros de peche ou alpendres, as que xeran a gran maioría das infraccións
nos concellos máis pequenos, precisamente os que máis necesitan do auxilio do
organismo autonómico para poder exercer as súas competencias en materia de
urbanismo. Neste sentido, Cerdeira explicou que a ampliación das competencias
da Aplu responde a unha demanda dos propios concellos, que reclaman que esta
poida asumir tamén a disciplina urbanística en todo tipo de obras e usos do
solo.
Así mesmo, outra das novidades anunciadas no
marco destas xornadas é a axilización dos trámites administrativos relacionados
cos recursos de reposición. Nestes momentos, as entidades locais adheridas
teñen atribuída a competencia para resolver estes recursos. A proposta da Aplu
é asumir esta competencia, previo informe de conformidade do concello, co fin
de axilizar e facilitar a xestión deste tipo de procedementos administrativos.
A delegación de todas estas competencias
municipais, en todo caso, será voluntaria e requirirá dunha modificación dos
convenios de adhesión subscritos entre cada concello e a Aplu, empezando polos
de menos de 5.000 habitantes, ao ser estes os que dispoñen de menos recursos
materiais e persoais.
Para rematar, Cerdeira explicou que, co fin de
ofrecer un servizo e unha atención mellorados, os concellos integrados na Aplu
verán incrementados en 2018 os seus ingresos en concepto de multas e sancións,
xa que pasarán a percibir o 10% de todo o diñeiro que recade o organismo
autonómico no seu termo municipal en aplicación tanto das competencias
urbanísticas cedidas como das propias da axencia.
O ente autonómico tamén creará este ano un
servizo de cooperación e asistencia municipal e estreará páxina web, incluíndo
na mesma un novo espazo de atención específica para todas as entidades locais
adheridas.
Dos 66 concellos adheridos á axencia na
actualidade, 11 pertencen á provincia de Pontevedra. Sen embargo, a xornada de
hoxe contou cunha representación provincial moito máis importante, xa que se
inscribiron representantes de 43 municipios pontevedreses. Por este motivo,
durante a súa intervención o director da Aplu emprazou aos alcaldes presentes a
reflexionar e valorar a súa integración na axencia para, entre todos, sumar
esforzos co obxectivo común de protexer o territorio.
Desde que o pasado 31 de xaneiro a conselleira
de Medio Ambiente, Beatriz Mato, inaugurou en A Coruña a primeira destas
xornadas, máis de 300 alcaldes, concelleiros e técnicos da área de urbanismo de
toda Galicia puideron coñecer de primeira man as novidades nas que traballa a
Aplu para optimizar o seu funcionamento e ampliar o abano de servizos a
disposición dos concellos que delegan nela parte das súas competencias.
Balance de 2017
O proceso de renovación e ampliación de
competencias que afrontará a Axencia de Protección da Legalidade Urbanística en
2018 vén precedido dun ano con resultados excelentes. Así, en 2017 executáronse
un total de 205 reposicións urbanísticas, unha cifra récord xa que foi a máis
alta desde a posta en marcha da axencia no ano 2007.
Por outra banda, o organismo autonómico
tamén resolveu 441 expedientes e realizou 1.256 inspeccións, un labor de
prevención fundamental para impedir agresións ao territorio.
SAÚDOS,
GABINETE DE COMUNICACIÓN DA CONSELLERÍA DE
MEDIO AMBIENTE E ORDENACIÓN DO TERRITORIO
No hay comentarios:
Publicar un comentario