A DEPUTACIÓN DEBATERÁ EN PLENO UNHA MOCIÓN DO PP PARA QUE SE MANTEÑA A ARBITRAXE E QUE OS AFECTADOS POR PREFERENTES NON SUFRAN QUITA - Voz de Barro. Noticias

Breaking

El tiempo en Barro

El tiempo - Tutiempo.net

viernes, 11 de enero de 2013

A DEPUTACIÓN DEBATERÁ EN PLENO UNHA MOCIÓN DO PP PARA QUE SE MANTEÑA A ARBITRAXE E QUE OS AFECTADOS POR PREFERENTES NON SUFRAN QUITA


Louzán remitiu unha carta ao presidente de NGB para que reciba unha delegación de afectados e alcaldes e explique a situación actual

·        Rafael Louzán recibiu a unha ampla delegación de representantes de todas as plataformas de afectados da provincia
·        Subliñou que a Deputación e todas as administracións “teñen que ser as primeiras aliadas” das persoas que “foron estafadas”
A corporación da Deputación Provincial de Pontevedra debaterá no próximo pleno unha moción do PP para reclamar que se manteña a vía da arbitraxe, que os afectados non sufran quita e que, no caso de que os produtos se cambian se faga por outros que teñan liquidez inmediata, de forma que as familias poidan recuperar os seus aforros.
Así o anunciou esta mañá o presidente da Deputación, Rafael Louzán, durante a reunión que mantivo cunha representación dos afectados polas preferentes, que acudiron á sede da deputación acompañados por diferentes alcaldes e alcaldesas, mentres outros afectados permanecían concentrados á porta da institución provincial.
Louzán incidiu en que a Deputación Provincial é plenamente consciente do grave problema que supuxo a comercialización destes produtos financeiros que, segundo dixo “nunca se debeu autorizar”. Así, amosou a súa plena solidariedade con todos os afectados e afectadas, incidindo en que a Deputación “é unha aliada de todas as persoas estafadas”, como o teñen que ser todas e cada unha das administracións.
Neste sentido, incidiu en que ao traballo feito tanto desde a Xunta de Galicia, pioneira en poñer en marcha a vía da arbitraxe que xa permitiu resolver uns 12.000 expedientes e devolver aos afectados 200 millóns de euros; como desde a propia Deputación, a través da súa Oficina Provincia de Información ao Consumidor, que tramitou 888 reclamacións, non vai parar.
Louzán comunicoulle, ademais, aos afectados que xa remitiu ao presidente de Nova Galicia Banco, José María Castellano, unha carta solicitándolle un encontro con representantes dos afectados, alcaldes e o propio presidente provincial “para que explique cal é a situación actual” e abordar as solucións que se poidan plantear.
ACHEGAS DOS AFECTADOS
A xuntanza, na que participaron preto de 100 representantes de todas as plataformas de afectados e os alcaldes das zonas con máis concentración de casos así como as deputadas Ana Isabel Vázquez e Begoña Estévez e a xerente do Instituto Galego de Consumo, María Jesús Muñoz, entre outros, serviu para aclarar dúbidas e para intercambiar opinións sobre a situación.
Así, os afectados fixéronlle chegar ao presidente da Deputación un escrito no que expoñen as súas principais demandas e que solicitaron que fosen incluídas na moción que se levará a pleno a finais de mes e que Rafael Louzán recibiu asegurando que se terán en conta na moción, xa que non só coinciden co espírito da moción dos populares senón tamén co contido, reclamando, entre outras cousas, que se continúe coa vía da arbitraxe, que non se produzan quitas e que os afectados se recoñezan como aforradores e non investidores.
A proposta de acordo que recolle a moción do Grupo Popular pode, precisamente “Instar ao Banco de España, ao Ministerio de Economía, á Comisión Europea e ao FROB e NCG Banco a que se continúen resolvendo, a través da Arbitraxe de Consumo, todas as reclamacións presentadas en relación á comercialización de Participacións Preferentes e Obrigas Subordinadas por NCG Banco, ata a resolución definitiva de todas elas, en todos aqueles casos que cumpran con condicións similares aos xa resoltos” e “Instar ao FROB, ao Banco de España, ao Ministerio de Economía e á Comisión Europea a que os tenedores de Participacións Preferentes e Obrigas Subordinadas de NCG Banco non teñan que sufrir quitas, e de ter que soportar quitas, que sexa na menor contía posible e que os canxes poidan ser obxecto da súa realización líquida inmediata”.
RESOLVER DÚBIDAS
Pola súa banda, a xerente do Instituto Galego de Consumo aclarou diferentes dúbidas dos afectados como que a responsabilidade de autorizar estes produtos (comercializados na súa inmensa maioría entre 2005 e 2008) foi o Banco de España, correspondéndolle á Comisión Nacional do Mercado de Valores supervisar que a venta se producise correctamente, polo que nin o actual goberno galego nin o central teñen responsabilidade na mala praxe que se producise na colocación nin de preferentes nin de obrigas subordinadas.
Así mesmo, subliñou que a vía da arbitraxe é un procedemento voluntario e é á entidade financeira á que lle corresponde decidir se acepta ou non tratar pola vía da arbitraxe as reclamacións presentadas polos afectados.
Quixo aclarar así que o IGC está en condicións de atender diariamente todos os expedientes que a entidade remita para a arbitraxe, polo que se nestes momentos non se tramitan máis dos que se están a tramitar (medio cento diario) é porque a entidade non os remite.

No hay comentarios:

Publicar un comentario