Moción conxunta na Deputación Provincial do PP, PSOE E BNG sobre as Preferentes.

MOCIÓN CONXUNTA DOS GRUPOS PROVINCIAIS DO PARTIDO POPULAR (PP), PARTIDO SOCIALISTA OBREIRO ESPAÑOL-PARTIDO DOS SOCIALISTSA DE GALICIA (PSOE-PSdG) E BLOQUE NACIONALISTA GALEGO (BNG) AO PLENO DA DEPUTACIÓN DE PONTEVEDRA SOBRE A LIBERACIÓN E DESBLOQUEO DOS PRODUTOS FINANCIEIROS DE NOVAGALICIABANCO

 

Os grupos provinciais da Corporación Provincial de Pontevedra, ao abeiro da lexislación vixente, presentan diante do Pleno da Deputación de Pontevedra esta moción conxunta relativa á liberación e desbloqueo dos produtos financieiros de NovaGaliciaBanco.

PROPOSTA DE ACORDOS

1.- Manifestar o apoio da Deputación de Pontevedra, e de toda a súa Corporación, aos afectados/as polas participacións preferentes na súa xusta reclamación de que lles devolvan os cartos na súa totalidade.

2.- Instar á Xunta de Galicia, Dirección Xeral de Comercio, e ao Goberno do Estado a que sigan a adoptar medidas efectivas de protección dos clientes de entidades financieiras que investiron os seus aforros en instrumentos financieiros opacos, sen que por parte das entidades fosen informados debidamente dos riscos do produto e sen que se cumprisen as demais obrigas establecidas na normativa, co fin de que poidan recuperar os seus aforros no prazo de tempo máis breve posible.

3.- Instar ao Banco de España e á Comisión Nacional do Mercado de Valores, ao obxecto de que promova unha solución para a recuperación do investimento realizado polos subscritores de participacións preferentes en Galicia.

4.- Instar á entidade financieira NovaGaliciaBanco a promover unha solución para os subscritores de participacións preferentes que desexen recuperar os cartos investidos neste produto, permitindo aos afectados a recuperación íntegra do investimento realizado.

5.- Esixir a depuración de responsabilidades aos executivos e directivos das entidades financieiras que impulsaron e cometeron fraude masivo aos pequenos aforradores.

6.- Demandar das autoridades competentes o cumprimento estrito da normativa MIFID (Directiva sobre mercados de Instrumentos Financieiros)

En Pontevedra, a 25 de xaneiro de 2013

Asinado:

 

José Manuel Figueroa Vila (PP)   Héctor Santos Rodríguez (PSdG-PSOE) e Cesáreo Mosquera Lorenzo (BNG)