Os equipos de fútbol da Escola Municipal de Barro recibiron as medallas na Festa HQR!

A Festa HQR! baixou na tarde de onte o pano da súa undécima edición coa satisfación de ver os seus obxectivos cumpridos. Un ano máis, a festa do deporte que organiza Diario de Pontevedra bateu marcas e superou a cifra de participación de edicións anteriores. Así, nesta ocasión, participaron 3.614 pequenos de diferentes clubs da comarca.

Durante a cerimonia de clausura, fíxose entrega das medallas aos nenos e nenas que participaron nos torneos de fútbol e fútbol sala que se disputaron durante a xornada de onte. Así, un a un foron subindo ao escenario os integrantes dos equipos do Barro, Ancora D´Ouro, Marcón FS, Poio FS, Barqueiro e Praias de Pontevedra na modalidade de fútbol sala; e da Seca, SD Meniños do Domaio, Salgueiriños B, ED Poio, Marcón, SCD Salcedo, Salgueiriños C, SD Monteporreiro e Barro, en fútbol. Nesta mesma modalidade, en categoría biberón (que na festa acolle aos pequenos menores de seis anos), levaron medalla os compoñentes do Barro, Salcedo B, Poio A, Ancora D´Ouro A, EF Verdugo, SD Meniños do Domaio, Marcón Atlético, Poio B, EF Beluso, Ancora D´ Ouro B e Salcedo A.

Todos eles subiron a recoller orgullosos o premio polo seu esforzo e entrega no terreo de xogo. O metal é para todos o mesmo xa que a súa finalidade é agradecer a participación na Festa HQR! na que non hai vencedores nin vencidos. Na festa do deporte ninguén perde e todos gañan xa que o obxectivo é que os pequenos fagan deporte de maneira que se divirtan e interactúen con outros nenos. A filosofía deste evento pasa por promover unhas xornadas de convivencia entre os máis novos co deporte como fío condutor, así, promociónase a actividade física á vez que se fomentan valores como a amizade, o compañeirismo ou o traballo en equipo.