A DEPUTACIÓN DE PONTEVEDRA INCREMENTA EN 220.000 EUROS A ACHEGA DESTINADA AO SERVIZO DE AXUDA NO FOGAR

O obxectivo é que ningunha persoa que o precise e reúna os requisitos, se quede sen atención

·        A achega da Administración provincial ao financiamento dos servizos sociais comunitarios sitúase así nos 2,5 millóns de euros

A Xunta de Goberno da Deputación de Pontevedra acordou incrementar en 220.000 euros a contía que a Administración Provincial destina ao financiamento dos servizos sociais comunitarios nos concellos de menos de 20.000 habitantes, que acada así a contía total de 2,5 millóns de euros.

Con esta achega preténdese dar resposta á demanda que os concellos teñen en materia de axuda no fogar e evitar que persoas que precisan deste servizo e reúnen os requisitos queden desatendidas.

A decisión adoptouse despois de coñecer as necesidades de cada un dos concellos que se acolleron a estas achegas e que permitiu determinar que a demanda de axuda no fogar nalgúns concellos requiría dun incremento na partida inicialmente disposta para este servizo.

Os concellos beneficiarios poderán ser O Covelo, Catoira, As Neves, Moraña, Cuntis, Ponte Caldelas, Vilaboa, Valga, Soutomaior, Salceda de Caselas, Silleda, Salvaterra de Miño, Baiona, Bueu, cambados, Gondomar, Poio, Tui, Sanxenxo, Nigrán e Moaña.