A Xunta lembra que non promove a realización de tratamentos aéreos con insecticida contra a praga do gorgullo do eucalipto

A Consellería do Medio Rural e do Mar tampouco recibiu polo de agora ningunha solicitude de particulares para usar este produto fitosanitario nas súas plantacións 

Ao Goberno galego unicamente lle compete avaliar as peticións que poida recibir e tramitar a correspondente autorización administrativa

A Xunta de Galicia non está a promover a realización de ningún tipo de “tratamento aéreo” co insecticida antiquitinizante denominado Flufenoxuron para o tratamento do gorgullo do eucalipto (de nome científico Gonipterus scutellatus). O Goberno galego tampouco recibiu polo de agora ningunha solicitude de particulares para usar este produto fitosanitario nas súas plantacións.

A Consellería do Medio Rural e do Mar ten coñecemento do interese dalgúns propietarios forestais sobre a posible utilización deste insecticida dentro dun plan financiado pola Asociación Española de Fabricantes de Pasta, Papel y Cartón (Aspapel) para loitar contra as defoliacións producidas polo gorgullo, que provocan a ralentización do desenvolvemento da árbore, afectando á produtividade da masa, podendo incluso producir a morte das árbores. O obxectivo do tratamento aéreo –tal e como foi trasladado polos promotores nunha sesión da Mesa da Madeira– é, en todo caso, o de diminuír as poboacións do gorgullo para facer máis eficaz a loita biolóxica, se ben aínda non se materializou nunha solicitude de tratamento.

Cómpre puntualizar ao respecto que á Xunta unicamente lle compete avaliar as peticións que poida recibir para emitir, no seu caso, a correspondente autorización administrativa que non é necesaria para os tratamentos desde terra, e insistir en que Medio Rural e Mar por iniciativa propia non contempla levar a cabo ningún tipo de tratamento aéreo co devandito produto antiquitinizante.

Aposta pola loita biolóxica
O único que veu facendo nos últimos tempos (e ten previsto continuar) a Consellería foi impulsar a loita biolóxica (non química) contra esta doenza. Neste sentido, esta primavera vaise incrementar –con respecto ao ano 2011– nun 164% o número de soltas de Anaphaes nitens, parasito natural e exclusivo de ootecas (ovos) de gorgullo. O obxectivo final deste sistema de loita é chegar a establecer un equilibrio entre as poboacións do insecto e as do seu parasito natural, reducindo con medios estritamente biolóxicos a poboación do primeiro por baixo do limiar da praga. É de destacar o contraste entre as 250.000 ootecas parasitadas que a Xunta de Galicia está colocando nos montes este ano, ás que se están engadindo outras tantas de promotores privados, fronte ás 19.000 que se colocaron no ano 2008.