-
Os dous equipos galegos da máxima categoría do fútbol nacional agasallarán coa camiseta do derbi e a pulseira do seu equipo as persoas que acudan a doar ás unidades móbiles no estadio de Balaídos e Riazor
O RC Celta de Vigo e o RC Deportivo da Coruña en colaboración coa
Axencia Galega de Sangue, Órganos e Tecidos, que integrou recentemente
ao Centro de Transfusión de Galicia,
comezan hoxe a campaña especial de doazón de sangue “Imposible sen ti”.
A iniciativa quere promover este acto solidario nas datas anteriores e
posteriores á Semana Santa, período de especial dificultade para acadar
unha participación axeitada.
Mediante a campaña “Imposible
sen ti”, Celta e Depor salientan o seu carácter solidario e amosan como,
ás portas do esperado derbi do vindeiro 3 de abril, a rivalidade
deportiva non é obstáculo para
desenvolver iniciativas conxuntas cun obxectivo común: acadar 500
doazóns diarias para poder atender aos doentes ingresados nos hospitais
galegos.
Agasallo aos participantes
Todas as persoas que acudan a doar este
mércores 23 de marzo ata as unidades móbiles ubicadas na
explanada do Pazo do Deportes de Riazor e no Estadio de Balaídos, así
como na zona Calvario (rúa Urzaiz, diante do mercado), das 09:30 ás
14:30 e das 15:30 ás 21.00 horas, recibirán un vale para
recoller a camiseta do derbi na Depor Tienda ou na tenda da Celta.
Así mesmo, tamén poderán subir
aos autobuses dos seus equipos que estarán ao carón das unidades
móbiles de doazón de sangue e recoller unha pulseira obsequio de cada
clube.
Vindeira semana
“Imposible sen ti” é unha
campaña que comeza hoxe e que terá continuidade na vindeira semana cunha
vintena de desprazamentos das unidades móbiles de doazón de sangue, ata
distintas zonas das cidades
da Coruña e Vigo, así como concellos limítrofes para tentar facilitar a
doazón a todas as persoas que queiran participar.
A Axencia Galega de Sangue,
Órganos e Tecidos quere amosar o seu sincero agradecemento ás
directivas, corpo técnico e xogadores do Celta e do Depor pola súa
colaboración nesta iniciativa solidaria.
Tamén, facer extensivo este agradecemento a todos os cidadáns que,
todos os días, doan sangue para que moitos enfermos podan solucionar o
seu problema de saúde e, mesmo, salvar vidas.
No hay comentarios:
Publicar un comentario