A DEPUTACIÓN DE PONTEVEDRA RENOVA DOUS ANOS MÁIS O CONTRATO PARA A EXPLOTACIÓN DA REDE DE BANDA LARGA RURAL

Iberbanda, a empresa encargada da explotación da rede Wimax da Deputación, ofertará unha mellora no prezo do servizo de 2 Mbps, pasando dos 41,14 € ós 30,25 €, IVE engadido

A Deputación de Pontevedra acaba de prorrogar dous anos máis o contrato con Iberbanda, empresa encargada da explotación da Rede Pontevedra Banda Larga Rural (Repoblar). Esta rede wimax, que foi impulsada pola institución provincial grazas á cofinanciación do 70% con fondos FEDER da Unión Europea, ten por obxectivo dotar de banda ancha sen arames a prezos alcanzables ás zonas rurais da provincia de Pontevedra.

O proxecto europeo Repoblar, cun orzamento de 6.693.868,53 €, abarca 55 concellos da provincia salvo Vigo, Pontevedra, Vilagarcía de Arousa, A Estrada, Marín, Redondela e Cangas que non se adheriron ó mesmo. Actualmente a rede, que explota Iberbanda desde fai catro anos, ofrece cobertura ó 99% da poboación dos 55 concellos sumando un total de 7.760 clientes.

A rede despregada a través do proxecto Repoblar é de titularidade pública e propiedade da Deputación de Pontevedra.  Iberbanda, pola súa parte, encárgase do subministro, explotación e mantemento, asumindo os custes de conservación, reparación e ampliación necesarios para a correcta prestación do servizo, así como da comercialización, xestión dos contratos de alta, baixo ou modificación, facturación, atención e soporte ós clientes e correcta prestación do servizo.

A través desta prórroga de dous anos, a Deputación de Pontevedra consegue que Iberbanda oferte, sen ningún custe asociado e coas mesmas condicións de servizo e calidade, unha mellora no prezo do servizo de 2 Mbps pasando dos 41,14 € mensuais que pagaban os clientes ós 30,25 € (IVE engadido).