A XUNTA INSTA Á DEPUTACIÓN DE PONTEVEDRA A MANTER A UNIDADE INSTITUCIONAL NA LOITA CONTRA O CORONAVIRUS

§  O delegado da Xunta en Pontevedra, José Manuel Cores Tourís recorda á presidenta da institución provincial a gravidade da crise e pídelle que deixe a un lado a política de confrontación

§  Insístelle na necesidade de colaboración para achegarl material de protección á plataforma loxística

§  Recórdalle que a Xunta de Galicia repartirá esta semana 100.000 mascarillas, 15.000 traxes e 50.000 guantes aos concellos de toda a comunidade autónoma a través de Clonegal

O delegado territorial da Xunta en Pontevedra, José Manuel Cores Tourís, instou hoxe á Deputación de Pontevedra  a manter a unidade institucional na loita contra o coronavirus.

“Por segundo día consecutivo asistimos, con sorpresa, ao intento da institución provincial de romper esta unidade”, explicou Cores Tourís, quen insistiu na importancia de que a presidenta da Deputación pontevedresa sexa “dunha vez por todas”consciente da gravidade da crise que estamos a afrontar e deixe a política de confrontación”.

O delegado territorial pídelle a Carmela Silva que participe na colaboración entre Xunta de Galicia e Fegamp, que dende a semana pasada permitiu repartir 22.000 mascarillas, 10.000 traxes e 300.000 luvas ao 80% dos concellos galegos.

“Dende a administración autonómica pedímoslle que se quere colaborar achegue material para que se distribúa dende a plataforma loxística, Clonegal, posta en marcha dende a Xunta e que permitirá repartir a próxima semana 100.000 mascarillas, 15.000 traxes e 50.000 luvas”, continuou o responsable territorial.

José Manuel Cores Tourís matiza que a crise do coronavirus “non entende de confrontacións políticas. Os recursos e tempo destinado a contestar á Deputación de Pontevedra son recursos e tempo que non se dedican ao verdadeiramente importante”.