A XUNTA PIDE Á DEPUTACIÓN DE PONTEVEDRA QUE SIGA O EXEMPLO DA CORUÑA E OURENSE E ACHEGUE MASCARILLAS PARA REPARTIR AOS CONCELLOS

• §  O delegado da Xunta en Pontevedra, José Manuel Cores Tourís insiste en recordarlle á presidenta da institución provincial a gravidade da crise e pídelle que deixe a un lado a política de confrontación e que teña lealdade institucional.
•  
• §  Insístelle na necesidade de colaboración para achegar material de protección á plataforma loxística

O delegado territorial da Xunta en Pontevedra, José Manuel Cores Tourís, volveu a solicitarlle hoxe á Deputación de Pontevedra  lealdade institucional na loita contra o coronavirus e que deixe a un lado a política de confrontación constante. 

Cores Tourís recordoulle a colaboración doutras deputacións como é o caso da de Ourense, o mesmo a da Coruña, que aportaron xa mascarillas á plataforma loxística da Xunta. “Ambas son un exemplo de lealdade e cooperación institucional entre administracións de distinto signo político, porque a loita contra o COVID-19 é unha labor de todos”.

Neste senso, o delegado territorial tamén lle recordou a Carmela Silva que “a Fegamp representa a todos os concellos e a todas as provincias, e que a súa coordinación coa Xunta está a ser excelente”, incluso con participación presencial en todos os CECOP.

“Seguimos asistindo, con sorpresa, ao intento da institución provincial de romper esta unidade”, explicou Cores Tourís, quen insistiu na importancia de que a presidenta da Deputación pontevedresa sexa “dunha vez por todas”consciente da gravidade da crise que estamos a afrontar e deixe a política de confrontación”.

“Dende a administración autonómica pedímoslle que se quere colaborar achegue material para que se distribúa dende a plataforma loxística, Clonegal, posta en marcha dende a Xunta”, continuou o delegado territorial, quen tamén quixo recordarlle á presidenta da institución provincial que a Xunta está a resolver dentro de prazo todos os expedientes de regulación temporal do emprego (ERTES) presentados. De feito, leva resoltos preto do 90% dos expedientes presentados, e que a ampliación de 5 a 10 días hábiles do prazo máximo de resolución dos Ertes por causa maior débese a que o Ministerio de Traballo enviou unha nota interpretativa pedindo a ampliación que se contempla na Lei de procedemento administrativo e a que, con este prazo, haberá máis seguridade xurídica.

O verdadeiro problema dos ERTES está en que, como leva advertindo a Xunta desde hai tres semanas, centos de persoas afectadas –e polo tanto as súas familias– polos expedientes de regulación temporal de emprego (ERTE) non teñen percibido por parte do Goberno a prestación pese a ser aprobado o seu ERTE pola autoridade laboral –competencia autonómica–.

“Desde a Xunta, que está resolvendo todos os expedientes en prazo, segue a solicitarse ao Goberno que aclare cantas prestacións pagou xa aos traballadores e traballadoras afectados polos ERTES en Galicia”, continuou Cores Tourís matizando que tamén se está a demandar ao Ministerio que “teña a máxima sensibilidade con estas familias e pague as prestacións por desemprego a medida que os expedientes se van resolvendo”.

Estas dúas cuestións xa foron plantexadas polo presidente da Xunta en varias Conferencias de Presidentes sen que ata a data nin Pedro Sánchez nin ningún membro do seu equipo de Goberno aclarase cal é a situación. “É preciso que o Goberno teña no pago das prestacións a mesma dilixencia que está tendo a Xunta para resolver todos os expedientes dentro do prazo establecido, porque  ninguén podería entender que unha familia teña que esperar ata o mes de maio para cobrar a súa prestación cando o traballador está na súa casa e cun ERTE xa autorizado”, rematou o delegado territorial.