§ A directora de Turismo, Nava Castro, e a delegada territorial da Xunta
en Vigo, Corina Porro, participaron nun encontro por videoconferencia con
profesionais
§ Deuse conta das máis de 600 accións formativas gratuítas e voluntarias
sobre seguridade sanitaria que se van poñer en marcha pola Xunta de Galicia
§ Tamén se informou do novo servizo de asesoramento e das medidas de
apoio e financiamento enmarcadas no Plan de
Reactivación do sector turístico que ten como piares a información,
asesoramento, formación e apoio económico
A directora de Turismo de Galicia, Nava Castro, a delegada territorial da
Xunta en Vigo, Corina Porro, e a xefa territorial da consellería de Cultura e
Turismo de Pontevedra, Mª José Echevarría, participaron xunto coa subdirectora técnica e
de planificación do ISSGA, Encarna Sousa Rodríguez e a xefa de Sección de
Hixiene Industrial e Analítica do Centro do ISSGA, Myriam Garabito, nunha videoconferencia con
representantes do sector turístico da provincia de Pontevedra para explicar os
catro piares sobre os que se sustenta o Pacto
por un destino seguro.
Durante o
encontro púxose de manifesto a importancia de que o sector conte neste proceso
de desescalada con todas as ferramentas precisas coas claves e protocolos
claros. Neste sentido, Nava Castro lembrou a batería de accións que xa están en
marcha para mellorar a información, asesoramento e formación das empresas e profesionais turísticos galegos en materia de seguridade sanitaria, así
como apoio económico para adecuarse á situación.
Como dixo, o
obxectivo fundamental é garantir que a nosa Comunidade sexa un destino seguro,
capaz de ofrecer as máximas condicións de seguridade sanitaria para
profesionais e usuarios, así como aos propios galegos. Para acadar este
obxectivo informouse da posta en marcha dun plan de formación voluntario e
gratuíto centrado neste eido e impartido polo Centro Superior de Hostelería de
Galicia (CSHG) e as entidades sectoriais e provinciais que conta cunha oferta estimada
de 65.000 prazas en 650 accións formativas de carácter xeral adaptadas ás
especificidades de cada subsector e de cada área xeográfica e que están
dispoñibles en https://www.turismo.gal/galiciadestinoseguro
Os relatores
tamén aclararon dúbidas en materia hixiénico-sanitaria que están recollidas nos
11 manuais xa dispoñibles nesa mesma páxina web á que nos vindeiros días se
irán incorporando novos materiais para outros sectores. Nava Castro calificou
de eficaces
ferramentas estes manuais informativos presentados hoxe ao sector turístico da
provincia de Pontevedra e que foron elaborados en colaboración co Centro
Superior de Hostelería de Galicia (CSHG), Saúde Pública e o Instituto de
Seguridade e Saúde Laboral (ISSGA), así como con representantes do sector e
entidades como o Instituto para a Calidade Turística Española (ICTE), a Federación
Galega de Municipios e Provincias (Fegamp) e especialistas como o profesor e
catedrático de Medicina Preventiva e Saúde Pública da USC, Juan Gestal.
Condensan os requisitos obrigatorios establecidos polo Ministerio de Sanidade,
as recomendacións elaboradas polo Ministerio de Industria, Comercio e Turismo e
outros consellos adaptados aos establecementos galegos para facilitar a súa
consulta.
En concreto,
disponse xa de manuais adaptados aos restaurantes, hoteis, aloxamentos rurais,
albergues, cámpings, balnearios, axencias de viaxes, turismo activo, campos de
golf, guías de turismo e oficinas de turismo. Poderanse actualizar en función
da evolución do estado de alarma e as diferentes instrucións derivadas do mando
único.
Tamén
se deu conta do novo teléfono gratuíto 900 815 334 para o asesoramento do
sector e as liñas de apoio económico aprobadas no último Consello da Xunta que,
como informou, están dispoñibles na nova web www.turismo.gal/galiciadestinoseguro.
Todas estas
iniciativas se enmarcan no programa Galicia,
destino seguro, que recolle ademais entre as súas medidas apoio económico
aos profesionais e establecementos do sector para a adopción de medidas de
seguridade hixiénico-sanitarias.
No hay comentarios:
Publicar un comentario