§
A directora xeral de Familia e
Inclusión, Amparo González, presentou onte na cidade de Pontevedra as novidades
da convocatoria para o próximo curso
§
As solicitudes poderán
presentarse ata o venres 21 de marzo inclusive
§
No baremo para nenos e nenas
de novo ingreso increméntase a puntuación otorgada a cada pai e nai por estar en
situación laboral de ocupación
§
As familias cunha renda pér
cápita igual ou inferior a 7.500 euros anuais beneficiaranse da exención total
de cota a partir do segundo fillo que acuda á mesma escola infantil
§
Na provincia de Pontevedra, a
oferta actual de prazas 0-3 é de 3.309, un 65,5 por cento máis que en 2009 e na
cidade o aumento foi do 127 por cento
O prazo para a presentación de solicitudes
nas escolas infantís A Galiña Azul está aberto ata o día 21 de marzo inclusive.
Así o anunciou onte na cidade de Pontevedra a directora xeral de Familia e Inclusión,
Amparo González, quen explicou as novidades da convocatoria para o próximo
curso.
Na rolda de prensa, a
directora xeral estivo acompañada da secretaria territorial da Delegación da
Xunta en Pontevedra, Ana Ortiz, así como da xefa territorial de Traballo e
Benestar de Pontevedra, María Peón.
Os requisitos e
procedementos para a solicitude de prazas publicáronse o pasado venres no
Diario Oficial de Galicia (DOG). A resolución cos prazos e o lugar de
presentación das instancias pode consultarse a través da web www.escolasinfantis.net ou no
propio centro, onde se queira matricular ao neno ou nena.
Segundo se sinala no
devandito anuncio do DOG, o prazo para a presentación de solicitudes de
renovación de praza ou de novo ingreso será dende o 22 de febreiro ata o 21 de
marzo inclusive, as listas provisionais de admitidos publicaranse o día 2 de
maio e as listas definitivas, o día 27 de maio. O prazo para formalizar a
matrícula dos nenos e nenas admitidos será dende o 28 de maio ata o 10 de xuño,
ambos os dous incluídos. O curso comezará o 4 de setembro.
A oferta total da Xunta
para o curso 2014/2015 ascende en toda Galicia a un total de 8.750 prazas en
148 escolas infantís. Na cidade de Pontevedra, a rede autonómica conta cun
total de 6 escolas infantís e 487 prazas, o que supón un incremento do 127 por
cento con respecto ao ano 2009. Esa oferta inclúe unha escola, a do edificio
administrativo da Xunta en Pontevedra, que terá un procedemento de matrícula
independente ao estar as prazas reservadas para os fillos de traballadores da
Administración autonómica. Na provincia de Pontevedra, a oferta actual de
prazas 0-3 é de 3.309, un 65,5 por cento máis que en 2009.
É preciso destacar que
a planificación da Consellería de Traballo e Benestar para a área territorial
de Pontevedra inclúe actualmente tres novas escolas, que se construirán nos
concellos de Tomiño, Marín e Ponteareas con 61,41 e 74 prazas respectivamente.
Novidades no procedemento
A orde que regula o procedemento de adxudicación de prazas nas escolas
infantís inclúe algunhas novidades. Así por exemplo, no baremo para nenos e
nenas que solicitan praza por primeira vez nunha escola a puntuación otorgada a
cada pai e nai en situación laboral de ocupación increméntase, pasando de 5 a 6
puntos. É preciso lembrar que xa o ano pasado este baremo incrementouse nun
punto.
Tamén no que respecta ao baremo, outorgaránselle, como novidade, 3
puntos aos beneficiarios dunha Renda de Integración Social de Galicia (RISGA)
que se atopen no tramo de inserción, co fin de dar cumprimento á Lei de
Inclusión Social de Galicia, que entrou en vigor en xaneiro deste ano e co
obxectivo fundamental de facilitar a vida laboral e familiar ás persoas perceptoras
de RISGA.
Así mesmo, as familias cunha renda pér cápita igual ou inferior aos
7.500 euros anuais beneficiaranse dunha exención total de cota a partir do
segundo fillo que acuda á mesma escola infantil.
Destacar tamén que se inclúe o suposto de enfermidade grave para
xustificar a necesidade de que un neno ou nena asista á escola infantil en
periodos en que os centros permanecen pechados. Ata agora a xustificación desa
necesidade era unicamente por motivos laborais.
Fóra de prazo e cheque
infantil
Ademais, e ao igual que o ano pasado, as solicitudes presentadas fóra
de prazo con xustificación admitiranse ata a data anterior á publicación da
relación provisional de admitidos (2 de maio) co fin de concretar e unificar
prazos en toda Galicia.
A documentación para optar a cheque infantil presentarase coa
solicitude de praza nas escolas, como xa se fixo o ano pasado co propósito de
axilizar a tramitación do mesmo.
No hay comentarios:
Publicar un comentario