SAEN A CONCURSO AS OBRAS DE URBANIZACIÓN DA RÚA AREAL EN BARRO E A PAVIMENTACIÓN E MELLORA DE CAMIÑOS RURAIS EN POIO

O Boletín Oficial da Provincia publica hoxe a convocatoria

·       As empresas interesadas poderán presentar as súas ofertas ata o 3 de marzo

·       O importe de licitación das obras é de 67.675 euros no caso de Barro e de 114.391 en Poio

A Deputación de Pontevedra saca a concurso as obras de urbanización e remate das Rúa Areal, no concello de Barro, e a pavimentación e mellora de diversos camiños rurais no concello de Poio.

O Boletín Oficial da Provincia publica hoxe a convocatoria do concurso público para a contratación das obras, que se fará polo procedemento aberto.

As empresas interesadas en executar estas obras poderán presentar as súas ofertas ata o vindeiro 3 de marzo.

No caso das obras que se van executar en Poio, contan cun orzamento de licitación de 114.391,57 euros e un prazo de execución de 3 meses.

Incluirán a pavimentación e mellora do firme do varios camiños nos núcleos de Monforte, Cotorela, Mato, Outeiro e Fonte.

Ademais dos traballos de mellora do firme, as obras incluirán o abastecemento de auga en Monforte e Cotorela, de forma que se procederá á canalización de auga con tubo de polietileno, así como á construción de arquetas de acometida para facilitar a conexión das vivendas á rede.

No camiño de Outeiro, para facilitar o movemento natural das augas pluviais, tamén se procederá á construción de cunetas revestidas e á colocación de pasos salvacunetas.

No caso dos camiños Monforte, Cotorela, Mato e Outeiro, a mellora do firme incluirá a limpeza e saneo da actual pavimentación, a dotación dun rego de imprimación e unha nova capa de aglomerado en quente. No caso do Camiño da Fonte, procederase á pavimentación con formigón, sobre unha base de saburra artificial.

Finalización da Rúa Areal

No concello de Barro, as obras que saca a concurso a Deputación  consistirán na dotación de servizos e beirarrúas e na reparación do pavimento da Rúa Areal, que na actualidade se atopa parcialmente urbanizada e que se pretende completar para a súa posta en servizo.

Os traballos, que contan cun orzamento de 67.675,32 euros e un prazo de execución de 2 meses, incluirán a reparación da calzada, dotándoa dunha capa de saburra artificial compactada, sobre a que se aplicará un rego de imprimación e unha capa de aglomerado en quente. Así mesmo, completarase a canalización das redes de pluviais, de abastecemento e saneamento, así como da rede de telecomunicacións e alumeado público; e completaranse as beirarrúas da marxe esquerda da rúa, con bordo de granito e firme de formigón.