PRETO DE 2.500 PERSOAS ASPIRAN A UNHAS DAS 424 BOLSAS DE PRÁCTICA LABORAL EN EMPRESAS, QUE LOUZÁN XA ANUNCIOU QUE SE AMPLIARÁN NOUTRAS 500 A PRINCIPIOS DE 2014

O obxectivo é que practicamente o 50% dos que presentaron solicitude poidan dispor de bolsa

·       Os bolseiros desenvolverán o seu labor en 379 empresas da provincia

·       O día 25 publicaranse as listas provisionais de admitidos na web da Deputación e os bolseiros disporán de 3 días para subsanar posibles defectos

·       Hai unha media de case 6 solicitantes por praza

Un total de 2.462 mozos e mozas aspiran a unha das 424 bolsas de práctica laboral en empresas que convoca a Deputación provincial de Pontevedra, que se ampliará noutras 500 a principios de 2014, segundo anunciou esta mañá o presidente da Administración Provincial, Rafael Louzán.

O obxectivo é, segundo anunciou Louzán, “dar cobertura a preto do 50% dos mozos e mozas que presentaron solicitude” de forma que poidan ter unha primeira oportunidade laboral na profesión para a que se formaron.

O 25 de novembro sairán publicadas na web da Deputación as listas provisionais de admitidos e excluídos e os solicitantes terán 3 días para subsanar erros.

Solicitudes por titulación

Das 2.462 solicitudes de bolsa, 1.600 presentáronse na sede de Pontevedra e outras 800 na de Vigo, evitándose así que moitos titulados do sur da provincia tiveran que desprazarse unha ou varias veces a Pontevedra para realizar este trámite.

O maior número de solicitantes son titulados universitarios con licenciaturas, cun total de 1.055 persoas que demandan participar neste plan. Séguenlle os titulados de ciclos superiores, con 608 solicitudes.

Outros 463 solicitantes son diplomados, 183 titulados en arquitectura técnica, 99 de enxeñerías e 54 de ciclos medios.

De 37 candidatos por praza a ofertas desertas

Aínda que a media é de 5,8 solicitantes por praza, a relación entre o número de solicitudes presentadas e as bolsas ofertadas varía notablemente dunhas especialidades a outras.

Así, atópanse titulacións como Educación Infantil, que é demandada por 2 empresas e para a que se presentaron 75 candidatos, o que supón que hai máis de 37 candidatos por praza; Dereito, con 113 candidatos para 9 prazas (12,5 por praza),  ou Empresariais, con 61 candidatos para 3 prazas (20 persoas por praza).

No outro extremo están o Ciclo Superior de Animación en 3D, xogos e contornos interactivos; enxeñerías en Telecomunicacións de Electrónica e en telecomunicacións de Telemática, e a Licenciatura en Enoloxía, que contaban cunha oferta en cada unha e para as que non hai candidatos.

Pola súa banda, os candidatos titulados dos ciclos superiores de Produción en Industrias Gráficas; Interpretación de Lingua de Signos; Construcións Metálicas; Dirección de Servizos de Restauración; da licenciatura de Farmacia e do ciclo medio de Agroecoloxía teñen garantida a súa colocación, dado que houbo tantas solicitudes como prazas ofertadas.

Menores de 30 anos

As bolsas van dirixidas a mozos e mozas titulados universitarios, de ciclos medios ou de ciclos superiores, de menos de 35 anos e que non teñan experiencia laboral previa na profesión para a que se formaron.

Os aspirantes poderán desenvolver o seu labor en 379 empresas de diferentes ramas de actividade da provincia de Pontevedra e a Deputación de Pontevedra correrá con todos os custes salariais dos bolseiros, así como cos gastos dos preceptivos recoñecementos médicos e dos cursos de formación en prevención de riscos laborais.

O obxectivo deste programa de emprego posto en marcha pola Deputación é facilitar a adquisición de experiencia laboral por parte de mozos e mozas titulados que ata o de agora non tiveran ningunha oportunidade neste eido.

Desta forma, preténdese favorecer a súa incorporación ao mercado laboral, algo que xa se tivo en conta á hora de proceder á selección das empresas que participan no programa, xa que non só se valorou o programa formativo propiamente dito, senón tamén as posibilidades de que a bolsa de práctica laboral se converta nun contrato de traballo unha vez que remate o período de prácticas.

Agora que pechou o prazo de solicitudes, será unha comisión formada por técnicos da Deputación, do sector empresarial e da Universidade de Vigo a que seleccionará aos bolseiros, tendo en conta, fundamentalmente, o seu currículo.

Partida orzamentaria para nova convocatoria

O obxectivo é que todos os beneficiarios do programa estean contratados antes de que remate o ano para comezar a traballar o vindeiro 2 de xaneiro.

Malia todo, Rafael Louzán incidiu na necesidade de seguir traballando nesta liña, dado que existe unha demanda e unha necesidade real de favorecer este primeiro contacto entre mozos e mozas titulados e empresas para facilitar a súa inserción laboral.

Por iso, subliñou que “as administracións debemos ser activas neste campo” e anunciou que a Deputación dispón xa de partida económica para a principios de 2014 estender este plan a outros 500 titulados.

Así, despois de asegurar que “hai marxe económico” para que as 424 prazas convocadas ata agora se amplíen ata 500 nesta primeira fase, quixo mandar unha mensaxe de “esperanzas aos que presentaron a documentación” para acceder a este plan e que poderían quedar fóra, que xa está previsto nos orzamentos “que imos a primeiros de ano realizar outra dotación para outras 500 prazas”, “dando posibilidades e oportunidades de traballo a preto do 50% dos titulados que presentaron solicitudes”.