§
Avanzou que a previsión é convocar o concurso público para a execución dos
traballos o vindeiro mes de abril
§
A actuación contará cun orzamento de máis de 500.000 euros e suporá a
construción dunha glorieta no punto quilométrico 8+250 para reducir a
velocidade de circulación
§
Ademais, rehabilitarase o firme no acceso ao polígono e ao núcleo de
Sequeiros, habilitaranse paradas de autobús, melloraranse as barreiras de
contención e a sinalización
§
A
Consellería e os veciños acordan que a seguinte fase de mellora desta estrada
consistirá na construción dunha rotonda na Devesa,
no PK 7+150, no termo municipal de Pontevedra
Pontevedra,
17 de febreiro de 2016.- A conselleira de
Infraestruturas e Vivenda, Ethel Vázquez, informou hoxe ao alcalde e a unha
representación de veciños de Barro do inicio do trámite para a adquisición dos
terreos necesarios para a mellora da seguridade viaria na estrada Pontevedra-
Baión (PO-531), na zona de acceso ao Polígono de Sequeiros. Así o trasladou a
representante do Goberno galego na xuntanza que esta tarde mantivo nas
instalacións da Xunta en Pontevedra co rexedor, Xosé Manuel Fernández, e
membros da Plataforma de Veciños desta estrada, acompañada polo director da
Axencia Galega de Infraestruturas, Francisco Menéndez, e polo delegado
territorial da Xunta na provincia, José Manuel Cores Tourís.
Na xuntanza, a conselleira deu conta da publicación hoxe no Diario Oficial de
Galicia do inicio do prazo de información pública do proxecto para mellorar a
seguridade viaria na estrada PO-531, ao seu paso polo Concello de Barro. Segundo avanzou a conselleira, estas obras suporán
un investimento de máis de 500.000 euros e a Axencia Galega de Infraestruturas
traballa coa previsión de iniciar o proceso de contratación dos traballos no
mes de abril.
Concretamente, trátase dunha actuación no
acceso do polígono de Sequeiros, no punto quilométrico 8+250 desta estrada ,
onde se construirá unha rotonda, co obxectivo de reducir de xeito significativo
a velocidade de circulación dos vehículos e evitar os numerosos cruzamentos que
se producen desde o carril central actual.
Nesta zona, o exceso de velocidade dos
condutores é unha das causas principais
da accidentalidade, segundo datos da
Garda Civil de Tráfico, polo que a execución da glorieta eliminará un punto
negro da estrada PO-531 ao seu paso polo Concello de Barro.
Ademais, rehabilitarase o
firme no acceso ao polígono e ao núcleo de Sequeiros, habilitaranse paradas de
autobús, melloraranse as barreiras de contención e a sinalización.
Esta actuación forma parte dun proxecto máis
amplo de mellora da seguridade viaria na PO-531 que se seguirá executando de
forma progresiva e conforme as prioridades que trasladen os veciños e o
Concello.
Así na xuntanza de hoxe, a Consellería de
Infraestruturas e os veciños acordaron que a seguinte
fase de mellora desta estrada consistirá na construción dunha rotonda na Devesa, no PK 7+150, no termo municipal de Pontevedra.
No hay comentarios:
Publicar un comentario