ANA ISABEL VÁZQUEZ ABORDA COS PRESIDENTES DE AJE GALICIA E PONTEVEDRA OS NOVOS RETOS DO EMPRESARIADO NA PROVINCIA

Lucía Pedroso e José Manuel Valenzuela trasladáronlle á deputada provincial os proxectos de AJE-Galicia

A deputada provincial Ana Isabel Vázquez recibiu esta mañá no seu despacho do Pazo Provincial a visita de Lucía Pedroso e de José Manuel Valenzuela, elixidos recentemente presidenta de AJE Pontevedra e de AJE Galicia, respectivamente, e que lle trasladaron os novos retos do empresariado en Galicia e na provincia.

Uns retos que pasan pola necesaria adaptación das empresas xa existentes ás novas circunstancias e, desde o punto de vista dos novos empresarios, por buscar fórmulas que acaben cos temores que frean a posta en marcha de multitude de proxectos empresariais.

Neste sentido, os representantes dos empresarios abordaron coa deputada provincial os proxectos de futuro de AJE Galicia a nivel autonómico e provincial, orientados fundamentalmente a fomentar o emprendedurismo, dándolle facilidades aos homes e mulleres que se deciden a poñer en marcha o seu propio negocio.

Así, Lucía Pedroso e José Manuel Valenzuela subliñaron o éxito que está a ter o viveiro de empresas que AJE ten en marcha na cidade, onde os emprendedores poden madurar e darlle forma ás súas ideas co asesoramento e apoio de AJE.

Os novos responsables de AJE incidiron na importancia de que todos se impliquen nestas labores de apoio aos emprendedores para facilitar a xeración de emprego, especialmente nun momento coma o actual.

Nesta liña, cómpre destacar que a Deputación provincial é plenamente sensible con esta necesidade e ten asinado xa un convenio de colaboración coa Fundación Incyde para a creación de dous viveiros de empresas na provincia, un que se situará no polígono de Barro-Meis e outro en Lalín 2000.