O CENTRO DE TRANSFUSIÓN CIFRA EN 2.000 DOAZÓNS DE SANGUE AS NECESIDADES DOS HOSPITAIS POR MOR DO FESTIVO DO 17 DE MAIO

·         Estas datas festivas coinciden cun incremento da demanda de compoñentes sanguíneos por parte dos centros sanitarios debido ao aumento das urxencias por mor dos accidentes de tráfico

A campaña de doazón de sangue que desenvolve a Consellería de Sanidade por medio do Centro de Transfusión de Galicia (CTG) refórzase nas xornadas previas ao festivo do 17 de maio en previsión dun incremento da demanda de compoñentes sanguíneos por parte dos centros sanitarios galegos. O obxectivo desta iniciativa do CTG pasa por acadar, entre o 13 e o 18 de maio, un total de 2.000 doazóns de sangue que son as que precisarán os nosos centros sanitarios para poder desenvolver axeitadamente o seu labor asistencial.

Lamentablemente, as datas festivas soen coincidir cun notable incremento da demanda de hemoderivados por parte dos centros sanitarios galegos xa que nestas datas increméntanse as urxencias derivadas dos accidentes de tráfico.

Desprazamentos

As dez unidades móbiles do CTG visitarán, ao longo da presente semana, preto de 40 concellos galegos para acadar a participación necesaria para garantir o desenvolvemento do labor asistencial dos centros sanitarios galegos que, cada día, precisan 500 doazóns de sangue.

O CTG agarda novamente contar coa participación dos cidadáns nesta campaña de doazón de sangue e, para iso, tenta ofrecer as máximas facilidades aos cidadáns, mediante o desprazamento de dez unidades móbiles cada día que efectuarán os seguintes desprazamentos:

DATA	CONCELLOS
Luns 13 de maio	Cantón Pequeno e Barrio Labañou (A Coruña), Neda, Escurís-Baiuca (Pobra do Caramiñal), Vilalba, Barrio do 21 (Ourense), Cuntis, Salceda de Caselas e Cabral (Vigo).
Martes 14 de maio	Zona A Gaiteira-Os Castros (A Coruña), Carral, Praza de Armas (Ferrol), Campus Norte (Santiago), Vilalba, Pontedeva, Raririz de Veiga, Caldas de Reis, Mondariz, Barrio Teis (Vigo) e Cuartel Figueirido (Vilaboa).
Mércores 15 de maio	Bº Monte Alto (A Coruña), Culleredo, Zona Ultramar (Ferrol), Campus Sur (Santiago), Xermade, CIE Galfor (San C.das Viñas), Xinzo de Limia, Bueu, Catoira, Cuartel Figueirido (Vilaboa) e Rúa Príncipe (Vigo)
Xoves 16 de maio	Zona Cuatro Caminos (A Coruña), Boiro, Fene, Rianxo, Zas, Sarria, Monterrei, Xinzo de Limia, Bueu, Cambados, Tui e Policía Nacional (Vigo)
Sábado 18 de maio	Fene, Rianxo, Zas, Laza e Tui

Ademais, tamén existe a posibilidade de doar sangue nos locais de doazón existentes nas sete grandes cidades galegas:

LUGAR	HORARIO
CENTRO DE TRANSFUSIÓN DE GALICIA (Santiago)	Luns a venres das 8.00 ás 22.00 horas Sábados das 8.00 ás 15.00 horas
COMPLEXO HOSPITALARIO UNIVERSITARIO DA CORUÑA (A Coruña)	Luns a venres das 8.00 ás 22.00 horas Sábados das 8.00 ás 15.00 horas
HOSPITAL ARQUITECTO MARCIDE (Ferrol)	Luns e venres das 8.00 ás 22.00 Martes, mércores e xoves das 8.00 ás 15.00 horas
HOSPITAL LUCUS AUGUSTI (Lugo)	Luns a venres das 8.00 ás 15.00 horas
COMPLEXO HOSPITALARIO UNIVERSITARIO DE OURENSE (Ourense)	Luns a venres das 8.00 ás 22.00 horas
HOSPITAL PROVINCIAL (Pontevedra)	Luns a venres das 8.00 ás 15.00 horas
HOSPITAL NICOLÁS PEÑA (Vigo)	Luns a venres das 8.00 ás 22.00 horas Sábados das 8.00 ás 15.00 horas

Cómo participar

Pode doar sangue calquera persoa de máis de 18 anos, que pese máis de 50 quilos e que non padeza nin teña padecido enfermidades transmisibles polo sangue (VIH, hepatite B ou C,...).

A doazón de sangue é un acto sinxelo que permite a moitas persoas solucionar o seu problema de saúde e, mesmo, salvar a súa vida.

Para máis información, o Centro de Transfusión de Galicia dispón da páxina web: ctg.sergas.es e tamén é posible chamar ao teléfono gratuíto de información para resolver calquera dúbida relacionada coa doazón de sangue ou   coñecer a data dos desprazamentos das unidades móbiles: 900 100 828