A DEPUTACIÓN DE PONTEVEDRA CELEBRARÁ O VINDEIRO DÍA 19 O PLENO EXTRAORDINARIO SOBRE PREFERENTES

A data foi fixada polos tres voceiros provinciais nunha xunta celebrada onte

·       O pleno foi solicitado por José Manuel Estévez en representación de todas as plataformas de afectados da provincia

·       Estará centrado exclusivamente en puntos relacionados coa situación actual dos preferentistas

O venres 19 de xullo terá lugar o pleno extraordinario da Deputación Provincial solicitado polas plataformas de afectados por preferentes e subordinadas. Así o acordou a xunta de voceiros reunida esta mañá no Pazo Provincial e na que participan César Mosquera polo BNG, Santor Héctor, polo PSdeG-PSOE, e José Manuel Figueroa, polo PP.

O pleno, solicitado por José Manuel Estévez como coordinador da Plataforma de Afectados Vigo-Val Miñor e en representación de todas as da provincia a á petición do cal se sumaron posteriormente PSdeG e BNG, centrarase exclusivamente en temas relacionados coa situación actual dos afectados, analizando asuntos como o apoio e asesoramento legal aos afectados, a continuidade da arbitraxe e as demandas de solucións para que as persoas que aínda non foron chamadas para a arbitraxe poidan recuperar os seus aforros.

Nesta liña, cómpre ter en conta que a Deputación de Pontevedra, en colaboración coa Unión de consumidores de Galicia, abriu xa o 18 de xuño 9 oficinas de asesoramento legal noutros tantos concellos da provincia co obxectivo, precisamente, de facilitar ese asesoramento legal que reclaman os afectados, tanto en relación á quita, ao troco e á liquidez; como en relación ás posibilidades de iniciar un proceso xudicial, o acceso á xustiza gratuíta e calquera outra dúbida que se lle poida presentar.

Na actualidade son máis de 40.000 as solicitudes de arbitraxe aceptadas por Nova Galicia Banco, o que suporá a devolución de preto de 500 millóns de euros atrapados nestes produtos.

Dar apoio e tratar de buscar unha solución para os afectados que non están nestes momentos incluídos na vía da arbitraxe é unha das liñas nas que traballa a Deputación e pola que puxo en marcha as anteditas oficinas de asistencia legal que, dada a gran demanda de atención recibida, duplicou o número de asesores e ampliou o horario das oficinas de Pontevedra e Vigo ás tardes.

De feito, de existir demanda, a oficina de Pontevedra abrirá tamén este xoves, malia ser festividade local. O obxectivo é que ninguén que precise e demande orientación se quede sen ela.