A DEPUTACIÓN IMPULSA UN PROXECTO PARA FOMENTAR A PRÁCTICA DO BALONCESTO NA PROVINCIA

En colaboración coa Federación Galega celebráronse adestramentos específicos con xogadores dos distintos clubs para perfeccionar o seu nivel, así como unha Copa de Baloncesto Infantil

A Deputación de Pontevedra está a impulsar este ano un novo proxecto que dotou con 6.000 euros para fomentar a práctica do baloncesto na área de Pontevedra. Así o explicou hoxe a deputada provincial Begoña estévez tras manter unha reunión co vicepresidente primeiro da Federación Galega de Baloncesto, Alberte Zato e Gómez de Liaño, do delegado desta entidade deportiva en Vigo, Jose Luis Perez Pérez; e do Delegado da FGB en Arousa, Jose Luis Renda.

Esta nova actividade permite ampliar o traballo que a entidade provincial está a desenvolver a través das escolas deportivas, neste caso cunha nova disciplina deportiva, para fomentar o deporte base na provincia de Pontevedra.

O plan consiste na organización de Cetis ou adestramentos “extra” de man de persoal cualificado destinados a mellorar e perfeccionar o nivel dos xogadores ou xogadoras dos distintos clubs que poderían formar parte das seleccións galegas. Estas actividades xa se foron realizando ó longo deste ano nas zonas de Vilagarcía, Tui, Caldas, Ponteareas.

No marco desta iniciativa tamén se desenvolveu a Copa Deputación de Pontevedra de Baloncesto nas categoría de Infantil masculina e feminina, resultando  como campións a Soleira Cortegada, no apartado feminino, e a C.B. Dorna en categoría masculina.