“Depo Aventura” A Lanzada oferta 2.200 prazas, 300 delas gratuítas, cun 7%
máis de orzamento e, como novidade, actividades de inmersión lingüística en
inglés
Esta mañá tivo lugar o sorteo
das prazas para o programa “Depo Aventura” A Lanzada que se desenvolverá entre
xuño e setembro nas instalacións que a Deputación de Pontevedra ten na Praia da
Lanzada (O Grove). A gran novidade da edición deste ano, amais das 300 prazas
gratuítas que se puxeron a disposición de menores en situación ou risco de
exclusión social xa o ano pasado, é que moitas das actividades dos campamentos
realizaranse integramente en inglés, impulsando a inmersión lingüística das
nenas e nenos nesta lingua estranxeira.
Unha vez realizado o sorteo
das prazas adxudicadas, os resultados disporanse na páxina web www.depo.es. Nun prazo de 24/48 horas as familias, mediante SMS ao
móbil, serán informadas da quenda que lle corresponde á/s súa/s filla/s e/ou
fillo/s e, neste mesmo SMS, informaráselles do número e clave correspondentes
para descargar na páxina web o recibo para a realización do pagamento.
A II edición do programa “Depo
Aventura A Lanzada” oferta 2.200 prazas para nenas e nenos da provincia de
Pontevedra. Delas, 300 serán gratuítas para menores en situación ou risco de
exclusión social, que poderán gozar de sete días na Lanzada en réxime de
pensión completa e cunha ampla programación de actividades para o tempo libre.
Neste eido, Carmela Silva adiantou que “amais de actividades lúdicas,
culturais, artísticas, medioambientais, deportivas e formativas, este ano imos
impulsar, por primeira vez, que unha parte importante das mesmas teña lugar en
inglés”. Por este motivo, este ano a Deputación de Pontevedra destina a “Depo
Aventura A Lanzada” 160.000 €, un 7% máis que o ano anterior.
“DepoAventura A Lanzada”
desenvolverase entre o 25
de xuño e o 9 de setembro en 11 quendas de 7 días de duración cada unha (do 25
de xuño ao 1 de xullo, do 2 ao 8 de xullo, do 9 ao 15 de xullo, do 16 ao 22 de
xullo, do 23 ao 29 de xullo, do 30 de xullo ao 5 de agosto, do 6 ao 12 de
agosto, do 13 ao 19 de agosto, do 20 ao 26 de agosto, do 27 de agosto ao 2 de
setembro, do 3 ao 9 de setembro).
No hay comentarios:
Publicar un comentario