A TEMPADA DE PESCA COMEZA ESTE DOMINGO PARA MÁIS DE 60.000 PESCADORES CON LICENZA QUE TERÁN ACCESO A 205.000 PERMISOS REPARTIDOS NOS 144 COUTOS ESTABLECIDOS NOS RÍOS GALEGOS

Agustín Hernández asistiu onte á solta de salmóns no couto de Cutián, no río Lérez

§          O 17 de marzo ábrese a veda da troita e o 1 de maio a do salmón, o reo e a troita de montaña

§         Hernández destaca a política de protección dos ríos e das súas especies promovida pola Xunta, que supón a eliminación de obstáculos nos leitos dos ríos

§         Entre 1995 e 2012 realizouse no río Lérez a solta de 1,2 millóns de exemplares de salmón co obxectivo de recuperar esta especie considerada “centinela” do bo estado das augas

Coa apertura da veda da troita, o vindeiro domingo 17 de marzo comeza a tempada de pesca fluvial en Galicia. Nos ríos da nosa comunidade están establecidos un  total de 144 coutos establecidos, nos que máis de 60.000 pescadores con licenza terán acceso a un máximo de  205.244 permisos de pesca. A veda para o reo, o salmón e a troita de montaña abrirase o 1 de maio.  

O conselleiro de Medio Ambiente, Territorio e Infraestruturas, Agustín Hernández, asistiu hoxe á solta de 10.000 exemplares de salmóns no couto de Cutián, no río Lérez, dentro do programa de recuperación desta especie que se vén levando a cabo dende os anos 90.

Destacou ademais a política de protección dos ríos e das súas especies a través da eliminación de obstáculos nos leitos dos ríos salmoneiros e de reos que xa non teñen utilidade e que perderon as concesións, así como a prohibición de construír novas presas, co obxectivo de facilitar o desprazamento dos reprodutores e as súas crías ao longo da conca nas súas migracións.

Recuperación do salmón no Lérez

A Xunta, dentro do programa de recuperación do salmón, está a traballar dende os anos 90 na recuperación desta especie no río Lérez, tras constatar un descenso na poboación e captura da mesma. Hernández explicou que se mellorou a accesibilidade nos últimos km de río, entre Bora e Monteporreiro; fixáronse medidas de redución da mortaldade por pesca; e repoboacións con indivíduos de orixe autóctono.

Manifestou que coa solta de hoxe acercáronse ás augas do Lérez esguíns, salmóns que sa se están preparando para ir ao mar e son todos fillos de salmóns deste río, nacidos na piscifactoría de Carballedo. Estes exemplares levan unha micromarca de seguimento, en caso de pesca, e partirán cara o mar en abril, polo que moitos deles chegarán ata a costa de Groenlandia.

Cómpre sinalar que entre 1997 e 2012 retornaron ao Lérez 398 salmóns marcados (375 contabilizados na estación de captura e 23 pescados). A taxa de recaptura de adultos no Lérez varía entre 0,6 e 2 por cada 1.000 alevíns soltados.

Repoboacións realizadas

O conselleiro de Medio Ambiente sinalou que o seu departamento é coñecedor dos problemas das especies, a pesar do numerosos traballos que se veñen realizando desde os anos 90, cando as poboacións de salmón acadaron o estado crítico.

Recordou que o salmón está considerado unha “especie centinela”, xa que a súa presenza é un bo indicador da calidade da auga e do hábitat fluvial.

Na seguinte táboa apréciase unha comparativa de repoboación de salmón nos ríos galegos dende o ano 2009. Pódese observar como a repoboación de salmón máis elevada predomina no río Lérez.

	Repoboacións de salmón 2009-2012
	2009	2010	2011	2012
RIO EO	32.199	22.851	15.299	23.005
RIO MASMA	40.103	13.576	13.000	19.000
RIO OURO	35.539	12.204	13.000	15.500
RIO LANDRO	48.772	16.884	14.500	17.500
RIO ULLA	120.802	83.394	119.917	109.436
RIO LÉREZ	110.048	140.743	127.692	101.137
RIO MIÑO	19.555	14.964	14.610	54.300
GALICIA	407.018	304.616	318.018	339.878

A previsión para 2013 é difícil de establecer posto que depende do ciclo natural da especie. Non obstante, segundo datos de anos anteriores, os exemplares oscilarán entre 300.000 e 400.000.

Tempada de pesca

O horario determinado para a pesca é entre una hora antes de saír o sol e una hora despois do solpor, segundo hora oficial publicada na páxina web de MeteoGalicia para a localidade máis próxima. No caso do reo, establécese un horario determinado pola Orde de normas de pesca 2013.

En relación aos días inhábiles para a práctica da pesca, fíxase o luns, agás festivos nacionais ou autonómicos. Nos coutos de pesca, serán os luns e xoves, excepto festivos nacionais ou autonómicos. No caso de tratarse de coutos conveniados con sociedades colaboradoras da pesca poderase pescar sen morte os xoves, ata o 30 de setembro. Para os tramos do río Navia compartidos con Asturias, son inhábiles os xoves, salvo festivos nacionais. Nas zonas de desembocadura e encoros con pesca autorizada de ciprínidos e perca negra, serán hábiles todos os días.

A continuación, a distribución dos 144 coutos establecidos para esta tempada, segundo a especie a capturar e a provincia.

	A CORUÑA	LUGO	OURENSE	PONTEVEDRA	GALICIA
SALMÓN	1	5	1	4	11
TROITA E REO	19+9	46+5	13+0	24+5	102+19
SEN MORTE	3	2	3	1	9
INTENSIVOS	1	1	1	0	3
	33	59	18	34	144

Troita

Para a captura de troita será precisa a licenza de pesca fluvial e o permiso no caso de ser un couto. Cada pescador poderá capturar entre 5 e 10 pezas por xornada, segundo a masa da auga. A dimensión mínima da especie oscila entre os 19 e os 23 cm.

Reo

A pesca de reo require da licenza de pesca fluvial, a recarga de reo e salmón e un permiso no caso de ser en couto. Cada pescador poderá capturar 2 pezas no Umia, 8 na Pontenova e 5 noutras masas, sempre por xornada. A dimensión mínima da peza será de 25 cm para Pontenova e 35 cm no resto.

 

Salmón

A captura de salmón precisa dunha licenza de pesca fluvial, a recarga de reo e salmón e o permiso no caso de tratarse dun couto. Tan só se permite unha captura por persoa e xornada, considerándose como dimensión mínima da peza os 40 cm, excepto en coutos do Reo compartidos con Asturias, que serán 45 cm.