Nava Castro incide no valor da enogastronomía como reclamo turístico na presentación da II edición de ‘Barro de tapas’ - Voz de Barro. Noticias

Breaking

El tiempo en Barro

El tiempo - Tutiempo.net

sábado, 16 de marzo de 2013

Nava Castro incide no valor da enogastronomía como reclamo turístico na presentación da II edición de ‘Barro de tapas’

A directora de Turismo de Galicia asistiu esta mañá en Barro á presentación da segunda edición deste evento que aglutina a dezaseis establecementos de restauración que durante once días potenciarán a gastronomía e os viños da zona a través desta ruta de bares e tapas nas Rías Baixas

Barro (Pontevedra), 16 de marzo de 2013.- A Asociación Cultural Amigos da Fervenza da Barosa organiza por segundo ano a ruta enogastronómica Barro de Tapas, que conta coa colaboración de Turismo de Galicia, a Deputación de Pontevedra, a D.O.P. Rías Baixas e mais co patrocinio de Saramagal, Moirama e Arousana de Bebidas.

Á presentación do evento que tivo lugar no Espazo Natural da Barosa esta mañá, asistiu a directora de Turismo de Galicia, Nava Castro quen incidiu no feito de que este tipo de accións promocionais constitúen “non só un xeito de potenciar a nosa gastronomía, a segunda motivación dos turistas que nos visitan para vir a Galicia, senón tamén un modo de activar a restauración da zona, de dinamizar turísticamente o territorio ou de complementar a visita por estas terras cunha lembranza culinaria”. Tamén recalcou o feito de que as tapas do certame estean acompañadas por bebidas elaboradas na terra e por xente nova e emprendedora que “dotan de valor engadido a esta experiencia”.

Segundo dixo Nava Castro, co gallo do Barro de Tapas, os viaxeiros que se acheguen á vila poden coñecer os recursos turísticos da zona e coñecer o municipio de Barro, cruzado de Sur a Norte polo Camiño Portugués a Santiago de Compostela e que discorre por A Portela, Agudelo e Barro, nunha contorna natural moi fermosa.

A directora de Turismo comentou durante a presentación que o Espazo Natural Río Barosa permite ao viaxeiro compaxinar a práctica da enogastronomía coa do sendeirismo grazas ao sendeiro de 4 km que percorre o río e no que se poden observar muíños de auga situado a xeito de fervenza e que conxugan a etnografía co medio ambiente. Ademais falou das manifestacións da arquitectura popular ou relixiosa, como a casa da Torre ou os Petos de Ánimas, como opcións para completar a visita cultural a esta terra.

Barro de Tapas
A ruta de bares está conformada por dezaseis establecementos do municipio de Barro e pode percorrerse dende hoxe ata o día 24 de marzo. Un viño Albariño ou unha cervexa artesanal máis unha tapa do certame custan 2,5 euros. Pode obterse información específica tecleando nas redes sociais Facebook e Twitter: @BarrodeTapas.


No hay comentarios:

Publicar un comentario