TRABALLO FINANCIA UN PROGRAMA DE ASESORAMENTO PARA PROMOVER O AUTOEMPREGO NAS CÁMARAS DE COMERCIO DE OURENSE E PONTEVEDRA

         

§         A iniciativa para fomentar a creación de empresas comezará no mes de setembro

§         O plan está dirixido principalmente a emprendedores que conten cunha idea de negocio ou que queiran consolidar a súa empresa ou mellorar a súa rendabilidade

§         O proxecto, que ten unha duración de 8 semanas, consta de sesións de formación conxunta e tamén accións de acompañamento e seguimento individualizado

§         En cada programa poderán participar un máximo de 25 persoas

A Consellería de Traballo e Benestar está a financiar un programa de asesoramento para promover o autoemprego e a creación de empresas que se porá en marcha o próximo mes de setembro nas cámaras de comercio de Ourense e Pontevedra.

A iniciativa, que conta co apoio do Fondo Social Europeo (FSE), pretende facilitar a elaboración dun proxecto de empresa ou un plan de mellora que poida servir non só como guía de referencia para a posta en marcha e/ou consolidación do seu negocio, senón tamén como medio de argumentación da súa viabilidade ante entidades públicas e financeiras.

Por iso, este plan está dirixido fundamentalmente a emprendedores que conten cunha idea de negocio e queiran realizar un proxecto viable de creación de empresa para a súa posterior posta en marcha e tamén a empresarios que desexen consolidar o seu negocio, mellorar a súa rendabilidade ou avaliar outras alternativas de expansión. En cada programa poderán participar un mínimo de 20 persoas e un máximo de 25.

A iniciativa consta tanto de sesións de formación conxunta, como de accións de acompañamento e seguimento individualizado. Ten unha duración total de 8 semanas consecutivas con 320 horas de formación.

Por unha banda, nas sesións de formación conxunta impartiranse os contidos xerais do programa co fin de proporcionar os coñecementos, ferramentas e habilidades esenciais e promover sinerxías e intercambios de experiencia entre os participantes. Entre as áreas de coñecemento a impartir destacan contidos de márketing, promoción e comercialización; creatividade, innovación e transferencia de tecnoloxía; aplicacións informáticas, xestión da información, internet e redes sociais; dirección de proxectos; finanzas e xurídico-fiscal na empresa; calidade, prevención de riscos laborais e medio ambiente; e de igualdade de oportunidades.

Con respecto aos seguimentos individualizados, o que se pretende é orientar a cada participante en función do seu perfil profesional e da actividade de cada empresa no proceso de aplicación e implementación dos contidos xerais abordados nas sesións conxuntas de formación.

Nestas titorías, ademais, abordarase o entorno no que se enmarca o proxecto empresarial e as características específicas, abrindo vías de desenvolvemento e consolidación da actividade realizada polo empresario, xestor, profesional ou emprendedor.

O programa será impartido por persoas con ampla experiencia profesional e docente. Tanto os contidos teóricos como prácticos adaptaranse á formación previa e coñecemento dos participantes, de maneira flexible e fomentando a participación, o debate e a busca conxunta de solucións e o desenvolvemento de casos prácticos. Analizaranse tamén proxectos de éxito e as posibles causas doutros que fracasaron ou non acadaron os seus principais obxectivos.