Louzán descarta unha subida ''masiva e repentina'' da taxa de lixo nos concellos

O presidente da Deputación, Rafael Louzán, descarta que a súa proposta para mancomunar o servizo de recollida de lixo nos concellos da provincia de menos de 25.000 habitantes (os municipios máis poboados, como Pontevedra e Vigo, encargan esta tarefa a unha empresa concesionaria) vaia supor un incremento no recibo.

''A disparidade existente na actualidade nas taxas que cobran os concellos aos seus veciños pola recollida do lixo son abismais e non se corresponden con diferenzas reais no custe do servizo'', sinala o presidente provincial en base a un informe elaborado polo ORAL (organismo ao que a maioría dos concellos da provincia teñen encomendada a tarefa de recadar os seus tributos).

Louzán cita a Barro e Poio como ''o exemplo máis evidente e rechamante'' da ''desproporción'' na contía dos recibos da recollida de lixo. ''Os veciños de Poio pagaron o ano pasado case 18 veces máis que o que pagaron os de Barro'', xa que mentres o municipio dirixido por Luciano Sobral tiña a taxa máis cara da provincia (104 euros), o presidido por José Antonio Landín foi o que estableceu o imposto máis económico (6 euros).