O instrumentista Esteban Batallán estreará con Manso e Amigos dous temas adicados ó Albariño e Cambados.

O Albariño está á volta da esquina. As primeiras casetas xa lucen na Calzada, os organizadores non se dan un respiro para rematar os últimos detalles e os comerciantes xa presentaron as bases para o concurso de lemas de camisetas, no que repartirá 700 euros. En resumidas contas, o movemento habitual nestas datas previas á semana grande pero diferente ao mesmo tempo porque esta 60 edición terá un son especial e non só porque o Rey da Balada, Julio Iglesias, vaia ofrecer o seu único concerto galego na vila que, por certo, vai vento en popa porque xa vendeu o 50% das localidades; tamén porque o grupo Manso e Amigos compuxo un tema adicado exclusivamente ao evento vitivinícola e outro á vila en particular. A súa estrea terá lugar o domingo, as 22:30 horas na Praza de Fefiñáns durante a gala de elección das Raíñas do Albariño, e co acompañamento do gran instrumentista Esteban Batallán. 


Precisamente o alcalde, Luis Aragunde, recibiu onte da man do propio “Manso”, Salvador Cores, e do resto de compoñentes do grupo (Ramón Vieites, Xoán Silva, Blas Domínguez, José Antonio Vilas e Olegario Falcón) as partituras. A adicada a capital do albariño leva por nome “A ti meu Cambados” e o seu estribillo correspóndese a unha dedicatoria inserida no “Vento Mareiro” de Ramón Cabanillas: “A ti meu Cambados, pobre, fidalgo e soñador, que o cantareiro son dos pinales i ó agarimo dos teus pazos lexendarios, dormes deitado ó sol, á veira do mar”. A melodía foi aportada por Gonzalo González e os arranxos polo conxunto vilaxoanés.

versos "da raza"
A inspiración do poeta da raza tamén está presente en “Amante Albariño” coas súas verbas: “Albariño ouro da terra/ sol que encendes os amores/alumeas corredoiras/e fas esquecer dores...”; e se misturan con outras de Cunqueiro: “Ven, ven, ven amante albariño, ven, ven, ven ó meu lado, ven, ven, ven delicioso albariño, ven, ven, ven meu amigo”; así como versos moi populares de Emilio Álvarez Blázquez como “Fumos ó viño Albariño/ fror da terra vendimada/ como quen vai de camiño/ e quedamos de pousada”.

No programa da festa tamén está incluida un evento gastronómico moi peculiar. A asociación cultural e veciñal Santa Cruz prepará hoxe unha paella xigante que poderá degustarse no campo da festa a partir das 14 horas por 6 euros que ademais, dan dereito a un pedazo de empanada, pan e viño tinto do país (a repetir). Pero, antes ás 10 horas, xa haberá actividades de entretenemento como un campionato de chave e outro de ran, e unha misa cantada na mesma carpa da festa.

Outra das citas inmediatas para estes días é a inscripción no concurso de camisetas da asociación de comerciantes, Cambados Zona Centro, porque o prazo remata o próximo día 3. Segundo as bases, presentadas onte polo seu presidente, Marcos González, na compaña do alcalde, é preciso formalizar a participación nas súas oficiñas, na rúa Ourense, e entregar un exemplar. A mellor levará 400 euros, a segunda 200 e haberá un tercer premio de 100 euros. Este ano rebaixáronse as cuantías porque a situación tamén é compricada para este sector. Os gañadores recibirán os seus recoñecementos o sábado, día 4.
Para ilustrar a iniciativa, a entidade elixiu unha imaxe de Julio Iglesias na que pon un exemplo de lema participante: “Albariño, un viño para presumir” para exemplarizar a necesidade de empregar o inxenio e o bo humor, deixando de lado a vulgar. Porque a, cada vez máis preto, presenza do “Rey da Balada” na localidade está causando auténtico furor.

A produtora Esmerarte informaba onte de que xa leva vendido case o 50% das localidades previstas para o seu concerto do día 1 en Fefiñáns, en tan só unha semana dende que se puxeron á venda. Resulta bastante lóxico tendo en conta que se trata do único concerto que ofrecerá este ano en Galicia, e sobre todo, dende que se fixo público que a súa cita co público canario tivo que suspenderse ata novo aviso por problemas de “loxística”. Cabe lembrar que nesta xira está a facer un repaso dos números un da súa carreira musical e que as entradas continúan á venda en El Cortes Inglés, Novagalicia Banco e a oficina de turismo de Cambados. E o concerto de Iglesias non é máis que o preludio de toda unha semana de festa. O contador do espíritu albariñense está en marcha