Dous motoristas resultan feridos tras bater contra un turismo

O accidente tiña lugar en torno ás cinco e media da tarde na estrada que une Vilagarcía con Pontevedra.

Unha manobra prohibida foi o desencadeante do sinistro. Segundo se recolle no informe de Protección Civil, o condutor dun turismo marca Opel Corsa que circulaba pola PO 531 sentido Pontevedra decidiu realizar un cambio no sentido da marcha pouco antes de chegar á igrexa de Barro, nun lugar cunha liña continua e no que non se permite realizar este viro. Polo carril contrario circulaba unha moto con dous ocupantes que se atoparon de súpeto co coche batendo contra el polo lado do ocupante. Como resultado do choque, a parella de motoristas caeu da moto resultando feridos de diversa consideración. Trátase dun mozo e unha moza que foron trasladados en ambulacia cara o hospital Montecelo, el con fractura nunha boneca e varios cortes e ela por dor nas cervicais. 

 

No que respecta ós ocupantes do coche, unha parella de mediana idade e de nacionalidade alemana, non foi preciso trasladalos ó centro médico. Tan só a muller presentaba varios cortes nos cóbados a consecuencia dos cristais que estouparon tralo choque. 

 

Ata o lugar do suceso desprazouse unha dotación de atestados, a Garda Civil de Tráfico, Protección Civil de Barro e dúas ambulancias do 061. 

O video da noticia na web de CanalRiasBaixas.