Concello de Barro e Deputación: Campamentos de Verán na Lanzada para nen@s de 8-13 anos

Concello de Barro e Deputación: Campamentos de Verán na Lanzada para nen@s de 8-13 anos

 Louzán incidiu en que este ano a selección dos participantes farase por medio dun sorteo electrónico ante notario

A DEPUTACIÓN LEVARÁ ESTE ANO Á LANZADA A PRETO DE 3.000 NENOS E NENAS, NO MARCO DO SEU PROGRAMA DE CAMPAMENTOS DE VERÁN

·        Terán preferencia os rapaces que non participasen en anos anteriores

A Deputación de Pontevedra levará este ano a preto de 3.000 nenos e nenas á Lanzada (O Grove), no marco do programa de campamentos de verán que vén desenvolvendo desde fai máis de dúas décadas nas instalacións que posúe no Grove.

Así o anunciou o presidente da Deputación, Rafael Louzán, quen destacou como novidade para este ano a selección dos participantes por medio dun sorteo electrónico ante notario para que, segundo indicou, “non poida haber ningunha dúbida sobre a legalidade e a transparencia” desta selección.

No sorteo, que se realizará en función das quendas de participación, terán prioridade aqueles solicitantes que non obtiveran praza nos anos anteriores e tamén se terán en conta outros datos, como os solicitantes que sexan irmáns.

Os campamentos desenvolveranse entre o 24 de xuño e o 8 de setembro –en quendas de 7 días- e van destinados a nenos e nenas nacidos entre 1999 e 2004, ambos os dous anos incluídos. 

Os participantes pasarán unha semana nos campamentos de A Lanzada no que “para moitos vai ser unha experiencia inolvidable” e onde terán a oportunidade de participar en múltiples actividades, que van desde o sendeirismo ata a vela, e unha excursión á Illa de Ons.

O prezo será de 68 euros por praza, xa que “non se vai incrementar en nada o prezo” con respecto ao ano anterior.

GRAN ÉXITO

Rafael Louzán puxo de manifesto o gran éxito que teñen estes campamentos, para os que hai unha elevadísima demanda. Así, lamentou que, malia os esforzos por incrementar as prazas cada ano –que pasaron das 400 de 2004 ás case 3.000 da actualidade-, adoitan quedar fóra case outros 3.000 nenos.

Louzán informou que a Deputación está a traballar para que se poidan ampliar as prazas, co obxectivo de que no prazo de dous anos se lle poida dar cabida a practicamente todos os que queren participar.

Así mesmo, anunciou que coa posta en marcha da Pousada da Lanzada darase cumprido tamén outro dos obxectivos da Deputación, que é todas as persoas teñan as mesmas oportunidades, polo que “a Pousada vai permitir que persoas con discapacidade poidan ter alí, unha vez que comece a funcionar, a oportunidade de disfrutar dese espazo, igual que o fan agora nos campamentos os nenos que non teñen ningunha discapacidade”.

Ademais, Rafael Louzán anunciou que se está traballando para que se poidan organizar, incluso este mesmo ano, campamentos de verán na propia Cidade Infantil Príncipe Felipe, xa que ten as instalacións axeitadas: piscina, instalacións deportivas e unha residencia con capacidade para 80 persoas que podería ser utilizada.

Trátase, concluíu o presidente provincial, de dar maiores posibilidades ás familias para “facerlle máis doada a conciliación da vida familiar e laboral e, incluso, para que lles sirva de descanso aos pais que, ás veces, non teñen outra oportunidade”.