Constitúese a Comisión de Alcaldes para a xestión conxunta de servizos na provincia

 

Entre outros servizos, contémplase o de recollida de lixo. Louzán asegurou que isto non suporá unha suba de impostos.

Facelo seguimento dos traballos para a posta en marcha da xestión conxunta da recollida de lixo, animais domésticos abandonados e outros servizos a nivel provincial. Este vai selo cometido da Comisión de Alcaldes que se ven de constituír na provincia de Pontevedra. 

 

Na súa primeira xuntanza, abordaron o Plan previsto pola Deputación para a recollida de residuos. Un Plan co que desde a administración provincial buscan, segundo explicou o seu Presidente, Rafael Louzán, ofrecer un servizo máis eficiente, eficaz e menos custoso a curto- medio prazo.

 

Esta uniformidade, asegurou Louzán, non vai supoñer unha suba de impostos. E engadiu que, unha vez en marcha a xestión conxunta, se é necesario desde a Deputación axudarán economicamente para regularizala situación sen ter que prexudicar ós cidadáns. 

 

E é que desde a Deputación son conscientes que a recollida de lixo é un servizo deficitario. Medidas como fomentala reciclaxe permitirá aforrar custes no servizo.

 

De cara a planificar un servizo provincial máis efectivo, de mellor calidade e de menor custo, Louzán informou que unha auditoría externa xa está traballando concello a concello para analizala situación actual da recollida do lixo.