A DEPUTACION APROBA AS AXUDAS BÁSICAS DE EMERXENCIA EN 53 CONCELLOS DA PROVINCIA

A Deputación provincial destina 465.000 € aos servizos sociais dos concellos

A Xunta de Goberno da Deputación de Pontevedra vén de aprobar as axudas aos concellos de menos de 20.000 habitantes polas que prestará apoio económico, de maneira excepcional e extraordinaria, para que os seus servizos sociais poidan atender as demandas urxentes dos cidadáns e cidadás que se atopan en situación ou risco de exclusión social. Terán atención especial aquelas persoas que, dentro desta situación, teñan menores de idade ao seu cargo. A Deputación destinou a esta liña de axudas a cantidade de 465.000 €, dos que 365.000 € serán investidos en axudas ao gasto corrente e, os 100.000 € restantes, para investimento.

Estas axudas, das que se beneficiarán todos os 53 concellos da provincia de Pontevedra con menos de 20.000 habitantes, están destinadas a aquelas persoas maiores de idade, empadroadas en calquera destes 53 concellos, que non dispoñan duns ingresos suficientes como para facer fronte aos gastos polos que solicitan a axuda, entre os que se contemplan a alimentación, uso de vivenda, pago de recibos, pago de produtos de hixiene e de limpeza, pago de produtos de farmacia, pago de desprazamentos ou apoio á infancia, entre outros.

A relación de concellos beneficiarios, en orde alfabética, é a seguinte: A Cañiza, A Guarda, A Illa de Arousa, A Lama, Agolada, Arbo, As Neves, Baiona, Barro, Bueu, Caldas de Reis, Cambados, Campo Lameiro, Catoira, Cerdedo, Cotobade, Covelo, Crecente, Cuntis, Dozón, Forcarei, Fornelos de Montes, Gondomar, Meaño, Meis, Moaña, Mondariz, Mondariz Balneario, Moraña, Mos, Nigrán, O Grove, O Porriño, O Rosal, Oia, Pazos de Borbén, Poio, Ponte Caldelas, Pontecesures, Portas, Ribadumia, Rodeiro, Salceda de Caselas, Salvaterra do Miño, Sanxenxo, Silleda, Soutomaior, Tomiño, Tui, Valga, Vila de Cruces, Vilaboa e, por último, Vilanova de Arousa.

A contía das axudas distribuíuse entre os 53 concellos beneficiarios atendendo a dous criterios: en primeiro lugar, o seu número de habitantes e, pola outra banda, a súa porcentaxe de desemprego. Os concellos recibirán entre 8.500 e 5.000 €, no caso de gasto corrente, e entre 2.400 e 1.500 € no caso de investimento.